Viloyatimizda bahor mavsumi yurtimizning boshqa hududlariga nisbatan ertaroq kelgani bois bu kunlar g‘alla parvarishi uchun muhim davr hisoblanadi. Hozirda amalga oshirilayotgan har bir sifatli agrotexnik tadbir hosildorlikni oshirish va xirmonning mo‘l-ko‘l bo‘lishini ta’minlashga xizmat qiladi.

Bugun Surxondaryo viloyati hokimi Ulug‘bek Qosimov Termiz, Sherobod va Jarqo‘rg‘on tumanlarida g‘alla parvarishi jarayonlari, xususan, o‘g‘itlash va suspenziyali ishlarning borishi bilan tanishdi. Shuningdek, mazkur tumanlarda 2025-yil hosili uchun o‘rim-yig‘im mavsumiga kombayn va qishloq xo‘jaligi texnikalarini tayyorlash ishlari ko‘rib chiqildi.

Jarqo‘rg‘on tumanidagi "Ismoiltepa" hududida joylashgan "Nurli diyor Oqoltini" fermer xo‘jaligining 15 gektarlik g‘alla maydonida begona o‘t, kasallik va zararkunandalarga qarshi "4 lik" ishchi eritmalar qo‘llanilishi jarayoni kuzatildi. Shu yerning o‘zida qishloq xo‘jaligi sohasi mutasaddilari, fermer xo‘jaliklari hamda kimyoviy vositalarni yetkazib beruvchi kompaniyalar vakillari ishtirokida seminar tashkil etildi.

Seminarda g‘alla kasalliklari, begona o‘tlar va zararkunanda hashoratlarga qarshi ishlatiladigan kimyoviy vositalar, ularning afzalliklari va qo‘llanish usullari haqida ma’lumot berildi. Shuningdek, taklif etilayotgan samarali vositalar mutasaddilar tomonidan taqdimot qilindi.

Surxondaryo.uz | Telegram | Facebook | Instagram | YouTube | X