VOBKENT.UZ | Rasmiy kanali

Veterinariya va chorvachilikni rivojlantirish qo‘mita raisi Bahrom Norqobilov Vobkent tumanida bo'ldi.

Latifsobungar mahallasida yashovchi Abdurasul Shonazarov ham keyingi yillarda bor kuch va imkoniyatini zotdor qo‘y boqishga safarbar etib, parvarishidagi nasldor qo‘y zotini 80 boshga yetkazgan. Havaskor sifatida uning aynan “Arashan” zotiga qiziqib qolgani bejiz emas. Bu zotdor qo‘y mahsuldorlik ko‘rsatkichlari yuqoriligi bilan ajralib turibdi. Jumladan, 6-7 oyda qo‘zilarining vazni 55-60, bir yoshda 75-80, katta qo‘chqorlar 175-180 kilogramm “tosh bosadi”. Katta qo‘yning vazni 180 kilogrammga, bo‘rdoqiga boqilsa, qo‘chqori 220 va hatto undan oshiqroq vaznga ega bo‘ladigan bu “pahlavon” qo‘y to‘g‘risida yurtimiz vodiy viloyatlarida ko‘proq bilishadi.

— Chorvador cho‘pon-cho‘liqlar yaxshi bilishadi, o‘zimizda qishning quruq izg‘iriniyu yoz jaziramasida hisori qo‘yni boqish oson ish emas, – deydi qo‘ychilikda seleksionerga aylangan Abdurasul Shonazarov. — Oilamiz bilan shu qo‘yni bo‘rdoqichilikda astoydil boqib ko‘rishni niyat qildik. Vodiy viloyatidan xarid qilingan qo‘yni moslashtirish uchun harakat qilib, mutaxassis zootexniklar, veterinarlardan tavsiya olib, o‘tgan to‘rt-besh yilda o‘z qo‘ramizga ega bo‘lganimiz oilaviy yutug‘imizdir.

Abdurasul Shonazarov ko‘p yil jaydari qo‘y boqqan mutaxassis sifatida bugun “son emas, sifat” tarafdoriga aylangan. Qo‘ychivon hozirda bu qo‘y zotidan kelib chiqib, bo‘rdoqichilikda bir bosh qo‘yning sof og‘irligini 200 kilogramdan oshirishni maqsad qilgan.

Veterinariya va chorvachilikni rivojlantirish qo‘mita raisi Bahrom Norqobilov boshchiligidagi ishchi guruhi ushbu xonadonda zotdor qo‘y parvarishi bilan yaqindan tanishar ekan, mas’ullarga uning faoliyatini qo‘llab-quvvatlash va ommalashtirishga doir tavsiya va topshiriqlarini berdi.

"Latifsobungar" MFYda istiqomat qilayotgan Muxtor Shodiyev bundan 10 yil burun xonadonidagi tomorqa yerining 5 sotix qismida barpo qilgan issiqxonasini tomchilatib sug‘orish texnologiyasi asosida jihozlab, unda sabzavot mahsulotlarini yetishtirish tajribasini o‘zlashtirgan. Keyinchalik bu issiqxona 8 sotixga yetkazilgach, gidroponika usulida qulupnay yetishtirish tajribasi ham o‘zlashtirilmoqda.

— Koreya texnologiyasi asosida tuproq o‘rnida — kokos qipig‘ini poytaxtdan buyurtma asosida xarid qilib, jo‘yak o‘rnida qatorlarga rezina shlangni tortib, hosil qilingan ekin maydoniga 10 ming tup qulupnay niholini o‘tqazib ish boshlaganmiz, – deydi tomorqachi Muxtor Shodiyev. — Gidroponika usulidagi faoliyatimizni boshlashga 200 million so‘m atrofida mablag‘ sarflagan bo‘lsak, endilikda bu sarmoyani bir mavsumda bemalol, shu qulupnay hosilidan bartaraf etish imkoniga egamiz. Buning uchun esa agrotexnik parvarishni to‘g‘ri olib borib, hademay hosilni 3 tonnadan oshirishni maqsad qilganmiz.

Umuman, kuz-qishki mavsumda issiqxona xo‘jaliklariga oson tutib bo‘lmaydi. Negaki, plyonka ostidagi haroratni talab darajasida, me’yorida saqlash taqozo qilinadi.

Muxtor Shodiyev ham ko‘p yildirki, issiqxona xo‘jaliklari uchun kamxarj va samarador isitish tizimi ustida bosh qotiradi va izlanadi. Darvoqe, uning asl kasb-kori elektr payvandlovchilik. Hatto, xorijga qatnab ishlaganida ham shu kasbi ortidan tirikchilik qilib, oilasini boqqan. Bugun esa u internet, ijtimoiy tarmoqlar orqali izlanib, Koreya va boshqa chet el texnologiyalari orqali nafaqat issiqxona, balki aholi yashash xonadonini qishki mavsumda qo‘lbola isitish pechini kashf etgan.

Aytish joizki, bu pech va qozonxona issiqxonachi mirishkor ustaning 5 yillik mehnati mahsuli. Bungacha esa muvaffaqiyatsiz urinishlar, metallolomga topshirilgan “namuna”larni aytmasa ham bo‘ladi. Ammo qat’iyati tufayli isitish pechi va qozonning hozircha optimal varianti yaratildi.

✅😎😎😎😎😎😎😎 ijtimoiy sahifalariga obuna bo‘ling

✅Telegram| 💬Facebook| 📹Youtube|🌍Web-sahifa