* * *

Тез кет.
Бу тоғлар қўйиб юбормайди сени.
Эртаклар ўқийди сенга,
Мол боқтиради, сомон ташитади,
Ўроқ ўрдиради саратоннинг жаримасида,
Лой қоритади, ғишт қуйдиради,
Уй қурдиради пахса девордан,
Уйлантиради сени,
Исён қилишингга йўл бермайди.

Ҳамма қатори кўз юмиб ароқ ичасан,
Ҳамма қатори намоз ўқийсан бош эгиб,
Ишга узоқ мамлакатларга қатнайсан,
Тўй қиласан топган пулингга.

Қўшиғингни фақат тошлар эшитиши мумкин,
Дардларингни фақат арчалар...
Кўз ёшларингни эса шамоллар артади.

Тез кет!
Бу тоғларда бахтли бўлишинг мумкин...
Тез кет.

Усмон АЗИМ

https://t.me/UsmonAzimijodi