Ulug’bek To’lqinov | Blog

Sizni o’stiradi

Fikrlash, ayniqsa teran fikrlay olish, juda ham qudratli qurol. Bu qurol sizda bo'lar ekan, o'zingizni boshqalarning mustahkam bo'lmagan, zaif va aldamchi bo'lgan argumentlaridan himoya qila olasiz.

Bu qurolga ega bo'lish uchun juda ham ko'plab yo'llar bo'lsa, bularning eng asosiysi bu - yozish...

Yozish bu fikrlash. Yozganda fikrlaymiz. Qanday eng oddiy so'z va jumla bilan tezroq va osonroq tushinishlariga sabab bo'la olishimiz haqida fikrlab, ichimizdagilarni so'zlarga ko'chiramiz.

Fikrlashi tiniq, so'zlarini dona-dona yetkaza oladigan, har qanday munozarada o'z qarashlarini oson va daqiq holatda tushuntirib bera oluvchi shaxslarga e'tibor beradigan bo'lsak, juda ham ko'pchiliklari doimiy yozish bilan shug'ullanib kelishlariga shohid bo'lamiz.

Kitob o'qish va yangi bilimlar egallash fikrlashimizni oshirsa, o'rganganlarimizni o'zimiz uchun qayd etib borishimiz, boshqalar bilan yozma xulosalarimiz o'rtoqlashishimiz fikrlashimiz kengayishini tezlashtirib beradi.

Yozish bilan shug'ullaning. Buni dastlab kundalik mashg'ulot va faoliyatingiz haqida yozishdan boshlang. Vaqt o'tib borishi bilan, o'rganganlaringiz va kuzatib, boshdan-kechirayotganlaringiz, anglashlaringiz haqida yozishni ham o'z odat-tusingizga aylantiring.

Yozganlaringizni tez-tez qayta o'qib, tahrirlash kerak qismlari bo'lsa, o'zgartirb turing- bu holat yozish mahoratingiz yaxshilanishiga keng qamrovda yordam beradi. Bora-bora qisqa vaqt muddatida ko'proq va sifatliroq yozishni boshlaysiz - rivojlanasiz.

O'z ustizngizda ishlashni nimadan boshlashni bilmay yurgan bo'lsangiz, bugunoq yozishdan boshlang.

Xoh bir jurnal tuting, xoh virtual holatda bu ishni blog yuritish orqali davom ettiring, ishonamanki, bu mashg'ulot sizga yaqin va uzoq muddatda albatta yordam beradi.

Boshlang.

©️Ulug'bek's notes

"Hayot haqida o'rganganlarimni uchta so'z bilan xulosa qila olaman: hayot dam etaveradi."

©️Robert Frost (Amerikalik mashhur shoir)

Bir haftalik jimlikni shu iqtibos bilan buzmoqchi bo'ldim, chunki men ham bir haftalik ijtimoiy tarmoqlardagi va shaxsiy hayotdagi "uzlat" - "yolg'iz qolish" ga harakatimdan keyin anglaganim shu bo'ldi. Biz bu hayotda bormizmi yoki yo'q, u davom etaveradi. Vaqt o'tishi bilan biz ham, atrofimizdagi hozirgi yaqinlarimiz ham bu holatga ko'nikamiz.

Shunday ekan, o'zimizni juda ham muhim shaxsdek tutishimiz yoki boshqalarga buni isbotlash uchun qiladigan sayi-harakatimiz bekor.

Qisqa umrimiz davomida bizga berilganlardan boricha foydalana olishimiz va ulardan roxatlanish orqali zavq bilan yashashimiz ushbu davom etaveradigan hayotda g'olib bo'lishimizni ta'minlab beradi.

Esimizda turishi kerakki, u davom etaveradi.

Har istaganim nasb boʻladi deb hisoblamoq oʻzini aldashdir.
Ba’zan siz oʻylamagan narsalar nasibingiz boʻladi.

#kitobdan