*   *

Қачонлардир бу дунёда дарахт бўлган,
Инсон насли барбод қилган бутун бахтни.
Саратонда соясига ўтов тикиб,
Қаҳратонда ўтин қилган у дарахтни...

Қачонлардир бу дунёда бир Ишқ бўлган,
Элдан элга кўчган эртак, афсонаси.
Лайлилари ёвлар ютса,  қул бўлмаган,
Мажнунларнинг тилло бўлган остонаси...

Қачонлардир бу дунёда бир йўл бўлган,
Оқинлари эски ўлан айтиб ўтган.
Қўшиқлари ҳақсўз бўлган бир миллатнинг,
Ўтган зоғ бор,  орқасига қайтиб ўтган...

Қачонлардир бир халқ бўлган бу дунёда,
Йигитларин ер ўпмаган куракларин.
Қизларида ҳаё,  элда номус бўлган,
Юраклари бутун бўлган. Юраклари...

Қачонлардир бир юрт бўлган бу дунёда...
Охири йўқ эртаклардан санчар юрак.
Ота!!! Юртни балолардан асрагувчи,
Кенжа ботир мудом тирик бўлса керак?!!

Самариддин Саййидзод
16.09.2024.

@Sayyidzod