17-fevral – shoir Mansur Jumayev tavallud topgan kun!
RUHPORALAR
Turkumdan
Dunyoning sevgidek rozi yoʻq, jonim,
Yor koʻzidek rostgoʻy qozi yoʻq, jonim.
Quyuq soya solgan ogʻoch osti-yu
Sening suhbatingdan sozi yoʻq, jonim
***
Zax oyoqdan oʻtib, tomoqdan oldi,
Issiq boshdan oʻtib, oyoqdan oldi.
Bizlarni bexabar, begʻam deganlar,
Bilmadik, bu gapni qayoqdan oldi?!
***
Yashirib ne qildim nadomatimni,
Chalgʻidim, unutdim tilovatimni.
Goʻzalim, qoshingda yoʻqotgan edim,
Hanuz axtaraman halovatimni.
***
Kurash toʻxtamaydi ekan, toʻgʻrisi,
Qoʻlga qurol tutar kumush, zar, misi.
Dunyoning teng yarmi qul izlagan payt,
Erk deya qoʻzgʻalar qolgan yarmisi.
***
Agar bulbullari chamanga yotmas,
Demak, gʻunchalari magʻlub-u motmas.
Shoirlari uygʻoq boʻlgan vatanning
Botirlari aslo gʻaflatda qotmas.
📚 @akademnashr