وجه القمر Vajhulqomar

Hali ham o'sha gap.

Andijonga safar natijasidagi hissiyotlar haqida uzun nimadirlar qoralamoqchi edim. Sal keyinroq. Faqat bir narsa:

Bir kuni ota-onamnikiga borganda oilaviy suhbat davomida ukam aytib qoldi:
"Shaharda odamlar o'zlariga qulayliklar yaratib, shu qulayliklarni avaylab, asrab, unga xizmat qilib yashaydi. Viloyatdagilar shunchaki yashaydi".

Bu fikrga to'liq qo'shilmasam ham, ba'zida "haq gap" deb qo'yaman.

YouTubeda "Iqtibos podcast" ni bilsangiz kerak. Telegramda ham muallifning blogi bor. Faqat matn, 2 og'iz gap ko'plab boshqa kanallarning butun boridan afzal. Kuzatadigan insonlarni ham hurmat qilaman, "o'z ustida ishlaydikan" deb qo'yaman. Qaysi sohada bo'lmasin, kuzatuvchiga shaxsiy va ish hayotida asqotadigan, real texnikalarni o'rgatadi. Podcastning navbatdagi soni doimgidek barcha uchun foydali bo'ladi, deb o'ylayman. Ko'rmay qolmasligingiz uchun bir gapni qistirib ketay:

Bir marta ko'rishga arziydigan video aslida bir marta ko'rishga ham arzimaydi.

Maslahat olishimiz mumkin bo'lgan odamda 2 narsa jamlanishi kerak:
1. Bizning vaziyatimizni yaxshi bilishi.
2. Aqlli bo'lishi.

Takror o'qiganda ilm, bir marta o'qiganda ma'lumot hosil bo'ladi.

Kanaldagi obunachilar ham asosan o'zimga yaqin holatda bo'lgan ayol-qizlar. Shuning uchun podcastda qayta-qayta o'qilgani aytilgan kitoblarni o'zimizga moslashtirib, shayximizning, G'azzoliy, Oiz Qarniyning asarlariga o'zgartirishimiz mumkin.

Link

P.s.: buni yozganimga sal kam 1 hafta bo'libdi.

Kelgan xabarlarga ham tez orada javob yozaman. "Arabic from Alif" ga qabul shu kunlarda ochiladi.

Avvalgi onalar bolalarini parvarish qilganda, qornini to'yg'izganda bu ishlarni "buyuk inson bo'lsin" degan niyat bilan qilishgan. Hozirgi onalarimiz "tezroq uxlab qolsin, qorni to'ysin, yig'lmasin" deb qilishadi. Shunga yarasha katta bo'ladi-da.


A.Jalilovning "من هنا نبدأ" kitobi haqidagi suhbatidan.

#teshib_otgan_gaplar

Qorim deyarli bir yoshga kirdi, buvisi bilan ham ko'proq vaqt o'tkazishni boshladi. Oyisini esa yangi kurslarga qo'shilishga va tashkil qilishga ishtahalari ochilyapti.

Avvalgidek uzun fikrlarimni post qilib yozmayapman, balki tafakkur ham qilmayotgandekman. Oxirgi paytlar asosan maishiy ishlar bilan band bo'lib qoldim. Oddiy, rasmli yengil postlar ham qo'ymayapman. Nimadir yozgim kelsa, ortidan "senga nima foyda, ulargachi" deb o'ylab qolaman.

Ba'zida ommadan, ijtimoiy tarmoqlardan (faqat telegram bor shundayam) uzoq va tinch hayot afzal, deb o'ylayman. Lekin kanalda faol bo'lish, sizlar bilan muloqot, nimadir o'rgansam shu yerda bo'lishish, vaqtinchalik, o'zgaruvchan va subyektiv bo'lsa ham, fikrlarimni yozish o'z-o'zidan kayfiyatimni ko'tararkan. Yaqinda Ummu Zaynab kanallarida ham shu mavzuda yozib, kanaldagi faoliyatlari o'zlariga bo'lgan ishonchni 50% ga oshirganini aytdilar.

2022-yil avgustda Marvaridning taklifi bilan ochilgan ushbu "uycha"dan keyin o'zimda ancha-muncha o'zgarishlarni his qildim. 2 yarim yilda obunachilar soni o'ynab turdi 3k va 5k orasida, to'g'rirog'i buyog'iga faqat kamayyapti. Chunki aktivni ushlash, qiziqarli mavzularni yoritish, intriga muhim emas, xohlasam ham o'xshatolmayman. Qoidam bor: yozgim kelganda yozaman, kelmasa haftalab "Jimjitlik" romanini o'qib turasizlar. Kanaldagi tartibni-ku, bilasizlar: na hashtag bor, na xarita, na tanlangan bir yo'nalish.

Shu bahonada so'rab olay:
Kanalda mendan nimalarni kutib chiqib ketmay turibsizlar? Sizlarni ushlab turgan jihat qaysi? Izohlarda fikrlaringizni yozib qoldirsangiz, xursand bo'lardim. Bu kelajakdagi yo'lni belgilab olish uchun ham muhim.

Kurslar masalasiga kelsak, A0 va A1 guruhlarim bor. Yangi guruhlar uchun qabul Ramazondan keyin. Botga kelayotgan xabarlarga shunga javob yozolmadim. Lekin kimdir tezroq o'qigisi kelayotgan bo'lsa, kursning o'zini sotib olishi mumkin. Buni ko'pchilikka tavsiya qilmayman. Irodali, qat'iyatli, ustoz nazoratisiz ham ilm yo'lida yuroladigan talabalargina bu usulda o'zlashtirishlari mumkin.

Narxini so'rab botga yozadiganlarni ovora qilmay shu yerga yozaman.
🔹"Arabic from Alif" 360 ming (2 oylik barcha darslar)"
🔸"A1 — boshlang'ich arab tili" 570 ming (3 oylik barcha darslar)
Sinov darslari va boshqa ma'lumotlar uchun: @Vajhulqomar

Gapni nimadan boshlashni bilmadim. Xullas, uzoq duolardan so'ng bir emas, bir nechta ustozlarni topdim. Hozir uchtasidan dars olyapman. Hammasi andijonlik) mahalliychilikni umuman yoqtirmayman, shunchaki to'g'ri kelib qoldi. Ayniqsa, birining xarakterlari, metodlari, hazillaridan avvalgi o'zimni (faol, quvnoq) ko'raman.

Avval bolali, kelin o'quvchilarimni yaxshi tushunmaganimni endi tushunyapman. Hozir nisbatan bosiq, tushunuvchan o'qituvchiga aylanganman, lov etib yonmayapman.

Psixologiya va psixoterapiya kursini bitirdik, Allohga shukur. Endi e'tiborimni arab tiliga — asosiy va sevimli sohamga qaratdim. Albatta, Yahyo qoridan ortgan vaqtlarimda. Shu kunlarda bir yoshga kiradi. Allohim rohatini ko'rsatsin, lekin men o'zimni 5xga rejimiga qo'ysam ham, uning chaqqonligiga yetolmayman.

كلمة "أمس" إذا نُكّرت عُرّفت وإذا عُرّفت نُكّرت.

جاء أمسِ - جاء بالبارحة.
جاء الأمس - يمكن أنه قد جاء بالبارحة أو قبلها وقبل من ذلك.

"Kecha" so'zining tarjimasida ishlatiladigan "أمس" agar noaniq holatda bo'lsa, aniq kechagi kunni bildiradi. Aniq holatda esa kechadan oldingi qaysidir bir kun ma'nosini ifodalaydi.

1-misolda:
Kecha keldi - aynan bugundan oldingi kun.
2-misolda:
O'tgan kun keldi - kechadan oldingi yoki undan ham oldingi kun bo'lishi mumkin.

Vajhulqomar

Kecha Gavhar ustozning "Psixologiya va psixoterapiya" shogirdlik kurslari bo'yicha yakuniy imtihon bo'ldi. Kelasi hafta nasib qilsa, sertifikat ham olamiz. Avval darslar haqida ko'p yozardim. Hozir umumiy, qisqa va lo'nda xulosa yozgim keldi.

Dunyo hayotida qaysi cho'qqiga chiqish kerakligini bilardimu, qanday yo'llar, so'qmoqlar borligini, qaysi yo'lda qanday vositalar yordam bera olishini shu darslar davomida o'rgandik.

Xayolimga kelayotgan fikrlar nafsning qaysi illatidan chiqayotgan ovoz ekanligini tahlil qila boshladim.

O'zimizga mos, isbotlangan psixologiya aslida shundoqqina ko'z oldimizda — Balxiy, Farobiy, G'azzoliy asarlarida, shayximizning kitoblarida mavjudligi qaytadan, balki yangi kashf qilingan haqiqat bo'ldi.

Asarlarni tafakkur, klassifikatsiya qilib, solishtirib , umumiylashtirib o'qish odati shakllandi (nisbatan).

Sezgi, tafakkur, xotira va boshqa ruhiy jarayonlardagi normal holat va kasallik o'rtasidagi farqlar bilan tanishuv o'zimizga va yaqinlarimizga yordam berish uchun muhim ilm bo'ldi.

Ayniqsa, depressiya bilan butunlay yangidan tanishdim. Endi depressiyadaman demayman ham, shunday deganlarga oson ishonmasam ham kerak. Biz depressiya deb o'ylagan holat katta ehtimol bilan nevrasteniya bo'lib chiqadi. Depressiya esa anchagina jiddiy holat hisoblanadi.

Psixoterapiya turlari "o'zim va yaqinlarim uchun o'rganaman" degan gapimga yaxshigina javob bo'ldi. O'zim va men kabilarni qiynaydigan noto'g'ri fikrlar, chigal vaziyatlarda samarali bo'ladigan texnikalarni qayta o'qib, soddalashtirib bemalol kundalik hayotda qo'llash mumkin.

Ilm va amalning orasida qanchalik farq borligini angladim. Bu xulosani eng oxiriga saqladim. Chunki yuqorida yozganlarim barchasi o'rganganlarim, amal qilayotganlarim deyolmayman. Lekin ilm dengizidan amal daryosiga tezroq o'tkazib olish niyatidaman. (Olgan ilmlarimiz ko'p, dengiz kabi. Amallarimiz esa aslida daryodan ham kichik).

Masalan, biz eng ko'p qoqiladigan yaxshi va yomon qadar Allohdan ekanligi mavzusini misol qilib olsak. Juda ko'pchiligimizda bu hissiy idrok yoki ilm darajasida qolgan. Boshimizga kelgan narsa Alloh taolodan ekanligini, bir barg ham Uning iznisiz to'kilmasligini juda yaxshi bilamiz. Hatto 3-bosqichga ham o'tgandirmiz — boshimizga kelgan ilk kunlarda jazo bo'lib ko'ringan hodisa aslida ne'matlarning boshlanishi ekanligini vaqt o'tib ko'ramiz va "har narsada hikmat bor ekanda" deymiz.

O'zim va atrofimdagi ko'pchilikdan kelib chiqib ayta olamanki, undan keyingi bosqichlarga o'tdik, desak yolg'on bo'lar. "Falonchi nimadir qilmaganda edi, bunday bo'lmasdi" degan gap tilimizdan chiqqanini, aqlimizdan o'tganini ham sezmay qolamiz. Aslida esa keyingi bosqichlarda qadar haqidagi ilm dalillar bilan sobit bo'lib, amallarimizni nazorat qilishi, fikrlarimizga singib ketishi, tuy'gularimizni ham boshqarishi kerak edi.

Yuqoridagi bosqichlarni o'ylash davomida kundalik hayotdan misol orqali tasavvur qildim, nozik nuqtam — kitoblarim. Buyurtma qilgan kitobim kech qoldi, aksiga olib usti ham qirilgan.

Taqdir ekanligini tushunarman, har narsa Alloh taoloning irodasi bilan bo'lishini bilarman, lekin bu yetmaydi. Hislarimni nazorat qilishim — g'azablanmasligim, amallarimni boshqarishi — yetkazib beruvchiga nolimasdan yaxshi muomala qilishim, shundagina chin aqida shakllangan bo'lar.

Vajhulqomar

Aqida — e'tiqodlar majmuasi bo'lib, insonda e'tiqod shakllanishi uchun uni yaxshi bilishi kerak bo'ladi. Ya'ni e'tiqod yoki aqida quyidagicha shakllanadi:

1. Hissiy idrok, ya'ni his qilamiz va tushunamiz.
2. Ilm, ma'rifat hosil bo'ladi.
3. Vaqt o'tishi bilan u ilm dalillar bilan sobit bo'lib, taqdiqlanadi.
4. Bu ilmga nisbatan mustahkam ishonch shakllanadi.
5. Endi bu ma'rifat aqlga, amalga ta'sir o'tkazadi.
6. Mazkur ilm fikrlarimizga aylanadi, his-tuyg'ularimizni nazorat qiladi, harakatlarimizni boshqadi. Shundagina u bizdagi aqida aylangan bo'ladi.

"Mo'minning me'roji" kitobi asosida tayyorlandi.

Vajhulqomar

I. Nafsi ammora (yomonlikka buyuruvchi nafs)
1. Shirk
2. Kufr
3. G’aflat
4. Jaholat
5. Gunohlarga sho’ng’imoq
6. Kibr
7. Hirs
8. Baxillik
9. G’azab
10. Hasad
11. Nafrat
12. Shahvat

II. Nafsi lavvoma (malomat qiluvchi nafs)
1. Fisq
2. Jahl
3. Ujb
4. Uyquni yaxshi ko’rish
5. Yeb-ichishga ruju qo’yish
6. Hirs
7. Qahr-u nadomat
8. Bezak va saltanat havasli bo’lish
9. Odamlar bilan murosasizlik

III. Nafsi mulhima (ilhomlangan nafs)
1. Ilm
2. Tavba
3. Sabr
4. Shukr
5. Juvonmardlik
6. Qanoat
7. Bardosh

IV. Nafsi mutmainna (xotirjam nafs)
1. Amal
2. Tavakkul
3. Ochlik
4. Riyozat
5. Ibodat
6. Tafakkur

V. Nafsi roziya (Allohdan rozi nafs)
1. Ixlos
2. Behuda va befoyda so’zlarni tark etish
3. Allohni zikr qilish

VI. Nafsi marziya (Alloh undan rozi bo'lgan nafs)
1. Allohdan boshqasini tark qilish.
2. Allohning maxluqlariga lutf bilan muomalada bo’lish.
3. Allohga yaqinlashish.
4. Allohning maxluqotlari haqida tafakkur qilish.
5. Allohning taqsimotiga rozilik.
6. Allohning ilm-u ma’rifatini egallash.

VII. Nafsi komila (Payg'ambarlar va avliyolar nafsi)

Muhammad Zohid Qutquning "Nafs nimadir?" kitobi asosida tayyorlandi

Vajhulqomar

Ekzistensial krizis – bu insonning hayot ma’nosi, qadriyatlari va o‘zligini shubha ostiga qo‘yishi natijasida yuzaga keladigan ichki inqiroz holatidir. Bu holatda inson "Men kimman?", "Hayotimning ma’nosi bormi?", "Men to‘g‘ri yo‘ldamanmi?" kabi chuqur savollar bilan kurashadi.
Ekzistensial krizis sabablari:
Hayotiy o‘zgarishlar – Yaqin kishining vafoti, kasallik, ajralish, ish yo‘qotish.
O‘lim haqidagi fikrlar – Inson o‘z hayotining chegaralanganligini tushuna boshlaydi.
Qarorlar va tanlovlar – Kelajakda qanday yo‘l tanlash haqida ichki kurash.
Qadriyatlar inqirozi – Oldin e’tiqod qilgan narsalarining ahamiyatini yo‘qotishi.
Maqsad yo‘qolishi – Oldin belgilangan maqsadga erishilgandan keyin yoki unga yetishish imkonsiz bo‘lib qolganda bo‘shliq hissi paydo bo‘lishi.
Ekzistensial krizis belgilari:
Hayot ma’nosiga shubha qilish
Yolg‘izlik va tushkunlik hissi
Ichki bo‘shliq, hech narsa qiziq tuyulmasligi
O‘lim haqida fikrlash
Qaror qabul qilishda qiynalish
Ushbu krizisdan qanday chiqish mumkin?
Hayot ma’nosini qayta aniqlash – O‘z qadriyatlaringizni chuqurroq o‘rganish.
O‘zligini anglash – Ichki sezgilar va istaklaringizga quloq solish.
Yangi maqsadlar qo‘yish – Hayotga ma’no beradigan yangi yo‘nalish topish.
Terapiya va ichki refleksiya – Ekzistensial terapiya, yozish texnikalari, fikr yuritish amaliyotlari.
Muloqot qilish – O‘z his-tuyg‘ularini ishonchli insonlar yoki psixoterapevt bilan baham ko‘rish.

Internet manbalari asosida tayyorlandi

Vajhulqomar