Odamiylik bahosi

Internetning qozoq segmentida yana o‘zbek bokschilari trendga chiqdi.

Gap shundaki, Qozog‘istonda Bekzat Sattorxonov degan mashhur bokschi bo‘lgan. U Sidney-2000 Olimpiadasida oltin medal olgan. Chempionlikdan 6 oy o‘tib, avtohalokatda vafot etgan.

Bekzatning onasi yaqinda intervyu berdi. Jurnalist "Sizdan kimlar xabar olib turadi?" deya so‘radi. Bunga javoban, faqat o‘zbek bokschilari har yili xabar olgani keladi, ba’zan katta Ikarus avtobusda kelgan payti ham bo‘lgan, ba’zan 10 kishilik mikroavtobusda kelishadi, bu yil ham kelishdi, lekin o‘zimizning qozoq bokschilaridan bir kishidan boshqa hech kim yo‘qlamaydi, 24 yildan buyon hech kimni ko‘rmadim, degan.

"Bizda ayrimlar o‘zbeklarni yomonlayapti-ku, shuncha oltin oldi deb ko‘rolmayapmiz, lekin bu noto‘g‘ri. O‘zbeklar qo‘shnilarimiz va ular nimaga erishsa, o‘z mehnati bilan erishyapti. Bundan tashqari o‘zbeklar o‘tganlarning ruhini qadrlashni ham biladi" — deya qo‘shimcha qilgan marhum chempionning onasi Sirliko‘l Sattarxonova.

Ushbu intervyu internetda yashin tezligida tarqalmoqda. Izohlarda esa qozoq qardoshlarimiz o‘zbek bokschilarining odamgarchiligini ulug‘lamoqda.

Ayrim izohlar:

"O‘zbek xalqi haqidagi fikrlarim keskin o‘zgardi. O‘zbek baurlarim, yaraysizlar!"

"Opa, ular sizdan doim duo olib yurishgan ekan-ku, oltinlarning siri ham shundadir balki, Alloh Sizning duolaringizni qabul qilibdi-da. O‘zbek baurlarimizdan Alloh rozi bo‘lsin"

"Duo bilan yer ko‘karadi... O‘zbek bokschilariga respekt, o‘shanchun natijasi 5 oltin ekan!!!"

"Bizda o‘zbeklarni yomonlaydigan ahmoqlar bor. Biroq o‘zlari ahmoq ekanligini bilmaydi"

👉 @xushnudbek 👈