Бутун кеча ўйчан ва сокин,
Хона ичра қолмишдик танҳо.
Бир ўйчанлик руҳимга ҳоким,
Шундай ҳоким руҳимга сен ҳам.

Оҳанг оқар. Деворда суврат:
Мовий денгиз устида кема...
Танҳолигу ўртада ҳурмат
Ва севгига ўхшаш бир нима.

Мен ўйлайман: «Недан бошлай гап?»
Сен ўйлайсан: «Не қилай жавоб?»
На кулади, на йиғлайди қалб,
Қарашларда яхлаган сароб.

Бутун кеча ўйчан ва сокин,
Хона ичра қолмишдик танҳо.
Мен демадим: «Севаман сени»,
«Севолмайман» демадинг сен ҳам.

(c)Рауф Парфи