Assalomu alaykum, hayotimizning quvonchi va fayzu farishtasi boʻlmish muhtarama ayollarimiz, munis opa-singillarimiz hamda talaba qizlarim!

Barchangizni nafosat va latofat bayrami hisoblangan 8-mart — Xalqaro xotin-qizlar kuni bilan chin qalbimdan muborakbod etaman.

Sizlar va siz orqali oilangizdagi barcha goʻzal ayol-qizlarga bu qutlug‘ bayram ko‘tarinki ruh va quvonch olib kelishini, jamiyatga yosh avlod shuurini ilm-u ma’rifat ila boyitishdek mashaqqatli ishingizda ulkan muvaffaqiyat hamisha hamroh boʻlishini tilayman.

Barchamiz yaxshi bilamizki, jamiyatimizda ayol oilaning asosiy tirgaklaridan biri hisoblanadi. U kechalari uyqusiz qoladigan, bolalarini o‘qitadigan, tarbiyalaydigan, g‘amxo‘rlik qiladigan va qo‘llab-quvvatlaydigan ayoldir.

U hayotning barcha og‘irliklarini jimgina o‘z yelkasida ko‘taradi va charchoqqa qaramay, tabassum qilib yashaydi.

Shunga qaramay, bordiyu oila aʼzolaridan biri muvaffaqiyatsizlikka uchrasa, barmoqlar darhol unga qaratiladi:
— Bolaning o‘qishi orqaga qolsa, “Ona qayerda?” deyishadi.
— Bolaning xulqi yomon bo‘lsa, “Ona uni tarbiyalamabdi!” deyishadi.
— Erning hayotidan qoniqmaganligida, “Xotin yetarli eʼtibor bermabdi!” deyishadi.
— Uy tartibsiz bo‘lsa, “Ona o‘z vazifasini bajarmabdi!” deyishadi.

Ammo haqiqat shuki, ayol — jarohatni davolovchi shifokor, qadriyatlarni singdiruvchi murabbiy, maslahat beruvchi maslahatchi va katta-yu kichikka g‘amxo‘rlik qiluvchi mehribon inson.

Shuning uchun, o‘z tinchligi va baxt-saodatidan boshqalar uchun voz kechadigan, barcha qiyinchiliklarga qaramay atrofidagi insonlarga xursandchilik ulashadigan ayolga chuqur hurmat va eʼtibor qaratmoq lozim.

Qadrli UBS oilasining bekalari!

Siz aziz muhtarama xotin-qizlarimizning umr yoʻlingiz doimo tuganmas latofat va maftunkorlik, baxt-u saodatga toʻla boʻlishini Yaratgandan tilab qolaman.

Goʻzallik bayramingiz yana bir bor muborak boʻlsin!