Xabaringiz bor, ayni kunlarda Toshkent yirik xalqaro tadbirga mezbonlik qilmoqda. Maktabgacha va maktab taʼlimi vazirligi, “Yangi Oʻzbekiston” universiteti va boshqa hamkorlar bilan birgalikda Markaziy Osiyo universitetlar forumi oʻtkazilmoqda.

Bugun forum doirasida xorijiy tashkilotlar vakillari ishtirokidagi ochiq muloqot boʻlib oʻtdi.

Soʻnggi yillarda Markaziy Osiyo davlatlarining hamkorlik aloqalari mustahkamlanib bormoqda. Bu aloqalar taʼlim tizimida ham aks etib borayotgani quvonarli. Markaziy Osiyo oʻzining yosh va oʻsib borayotgan aholisi bilan ulkan salohiyatga ega. Mintaqaning 75 milliondan ortiq aholisi bor. Ularning asosiy qismini yoshlar tashkil etadi. Oʻzbekistonning oʻzida aholining 60 foizidan ortigʻi 30 yoshgacha boʻlgan yoshlardir.

Bugungi tadbir faqat mintaqa doirasi bilangina cheklanib qolmagani quvonarli holat. Forumda Buyuk Britaniya, Germaniya, Xitoy kabi nufuzli davlatlarda joylashgan 60 dan ortiq xalqaro tashkilotlar, shuningdek, yuzga yaqin xorijiy oliygohlar hamda yurtimizdagi qator oliy taʼlim muassasalari vakillari ishtirok etmoqda.

Bugun tadbirlarimiz doirasida “Times Higher Education” reytingida tan olingan universitetlarni taqdirlash marosimi, xalqaro nufuzli mehmonlar bilan muhokama va uchrashuvlar boʻlib oʻtdi.

Umid qilamanki, bugungi muloqot yangi imkoniyatlarni ochib beradi, biz muntazam hamkorlikni mustahkamlab, katta maqsadlarimizga birgalikda erishamiz.

Forum tadbirlari davom etadi.

@hilola_umarova