Hilola Umarova

Navro‘z bayrami muborak bo‘lsin!

Hurmatli Prezidentimiz bayramda nafaqat yurtdoshlarimizni, balki xorijlik hamkorlarimizni, ziyolilarni alohida tabrikladilar.

Biz Navro‘z bayramida ahil jamoamiz hamda Garvard Universiteti va Massachusetts texnologiya instituti (MIT)ning magistrantlari bilan ishtirok etdik.

Mehmonlar bir umr unutilmas taassurot olganlarini aytishdi.

@hilola_umarova

Qadrli yurtdoshlar,
aziz hamkasblar!

Barchangizni bahor bayrami — Navro‘z ayyomi bilan samimiy muborakbod etaman!

Sharqona yangi yil bo‘lmish Navro‘z ezgulik, mehr-muhabbat va do'st-qadrdonlik bayramidir. Bu kun azal-azaldan o‘zgacha ishtiyoq va birdamlik bilan nishonlanadi.

Shu kunlarda yurtimiz bo‘ylab joylashgan ta’lim muassasalarida ham Navro‘z tantanalari bo‘lib o‘tmoqda. Unda pedagoglar va bolajonlarimiz tomonidan azaliy urf-odatlarimiz, milliyligimiz tarannum qilinmoqda.

Fursatdan foydalanib, shunday faraxbaxsh kunlarda barchangizga sog‘lik-salomatlik, ishlaringizga rivoj va muvaffaqiyatlar tilayman.

Bu yilgi ko‘klam tashrifi har qachongidan qutlug‘ kelsin, osmonimiz hamisha bugungidek tinch va musaffo bo‘lsin!

Yana bir bor Navro‘zi olam barchangizga muborak bo‘lsin!

Hilola Umarova,
Maktabgacha va maktab ta’limi vaziri

@hilola_umarova

#yangilik #ulashamiz #maoshlar_oshishi

Prezident farmoni imzolandi va undagi eng muhim oʻzgarishlar (foto)

Bugun hamkasblarimiz uchun yana bir muhim xushxabarni yetkazmoqchiman. Hurmatli Prezidentimiz Maktabgacha va maktab taʼlimi sohasida boshqaruv tizimi samaradorligini oshirish boʻyicha yangi Farmon imzoladi.

Keyingi yillarda oʻqituvchilarimiz, bogʻchadagi pedagoglarimiz oylik maoshlarini oshirish, ustamalar sonini koʻpaytirish boʻyicha qator islohotlar qilindi va bu jarayon davom etyapti. Endilikda maktab direktorlari, ularning oʻrinbosarlari hamda bogʻchalarimiz rahbarlari maoshlarini oshirishga navbat yetdi.

Farmondagi eng muhim yangiliklarni sanab oʻtsam:

– Maktab direktori va uning oʻrinbosarlari hamda maktabgacha taʼlim tashkiloti direktorlari ish haqi miqdorlari oshirilmoqda.

2025-yil 1-sentabrdan boshlab umumiy oʻrta taʼlim tashkilotlari direktori lavozimining bazaviy tarif stavkasi 20 foizga, oʻrinbosari lavozimining bazaviy tarif stavkasi 15 foizga oshirilib, bogʻchalarimiz direktorlari lavozimlarining bazaviy tarif stavkalari III va IV guruhdagi umumiy oʻrta taʼlim tashkiloti direktori oʻrinbosari lavozimining bazaviy tarif stavkalariga tenglashtirish orqali oshiriladi. Respublikadagi 10 mingdan ortiq maktab direktorlari, 7 mingga yaqin bogʻcha direktorlari hamda 35 mingga yaqin maktab direktor oʻrinbosarlarining ish haqi miqdorlari oshirilishiga erishiladi.

– 2026-yil 1-yanvardan boshlab umumiy oʻrta taʼlim tashkilotlarining direktor jamgʻarmasi mablagʻlari hisobidan direktor va uning oʻrinbosarlariga faoliyat samaradorligi koʻrsatkichlari (KPI) natijasiga koʻra bazaviy tarif stavkalariga nisbatan tegishlicha 20 va 10 foiz miqdorida har oylik ustamalar belgilanadi.

– Tuman boʻlimlarida qoʻshimcha shtatlar ajratilyapti va bu oʻquvchilar bilimini baholashni monitoring qilish, oʻquvchilarga xorijiy til va kasbga oʻrgatish vazifalarini amalga oshirish uchun tegishli lavozimlarni joriy etish imkoniyati yaratadi.

– Hududiy boʻlinmalari xodimlaringning koʻp yillik xizmati uchun ragʻbatlantirish joriy etilmoqda (Vazirlik tizimidagi qariyb 15 ming nafar boshqaruv xodimlariga koʻp yillik xizmati uchun ragʻbatlantirish tizimi yoʻlga qoʻyiladi).

– Maktab xodimlari mukofot puli miqdorini mehnatga haq toʻlashning eng kam miqdorining 75 foizigacha (amalda 50 foizgacha) miqdorida etib belgilanmoqda.

– Yana bir muhim oʻzgarish – avvallari maktablarimizning boʻsh turgan binolari ijarasidan tushgan mablagʻlarning 40 foizigina oʻsha maktabda qolardi. Endilikda ushbu mablagʻlarning 75 foizi oʻsha maktab rivojiga sarflanadi.

Umid qilamanki, tizimdagi yuz minglab xodimlar hayoti, ragʻbatlanishiga doir mazkur Farmon xodimlarimiz moddiy imkoniyatlarini yanada yaxshilab, ularga motivatsiya beradi, ish unumdorligini oshiradi. Pedagoglar, maktabgacha va maktab tizimi moddiy tomonlama ham jozibador sohaga aylanishi lozim, davlatimiz rahbari qoʻllovlari bilan bu masala bosqichma-bosqich hal etilmoqda.

Farmon bilan bogʻliq boshqa oʻzgarishlar haqida batafsil maʼlumot va sharhlar vazirlikning ijtimoiy tarmoq sahifalari orqali beriladi.

@hilola_umarova

Yaqinda Guliston shahridagi Prezident maktabining 11-sinf oʻquvchisi Asilbek AQSHning nufuzli Chikago universitetiga 420 000 AQSH dollar miqdoridagi toʻliq grant asosida oʻqishga qabul qilingani haqida maʼlum qilgan edim.

Bugun, Kun.uzʼning Asilbek haqidagi videomaterialini koʻrdim. Asilbek Ashurov Sirdaryo viloyatining Sayxunobod tumanida oddiy oilada tugʻilib oʻsgan. 8-sinfgacha tumandagi 8-umumtaʼlim maktabida oʻqigan. Keyinchalik Guliston shahridagi prezident maktabiga qabul qilingan. U intevyuda Prezident maktabida muhit haqida ham toʻxtalibdi, aytishicha, mazkur taʼlim dargohidagi yuqori talab va oʻquvchilarning kuchli intilishi uni oʻz ustida qattiqroq ishlashga undagan.

“Prezident maktabida darslar Cambridge xalqaro dasturi asosida oʻzbek va ingliz tillarida olib boriladi. Bu esa oʻquvchilarga xalqaro miqyosda tan olingan sertifikatlarni olish imkoniyatini yaratadi. Ingliz tili va mantiqiy fikrlash boʻyicha maktabda yaxshi baza toʻplaganim bois, IELTS va SAT uchun alohida repetitorga borib, tayyorlanmaganman. Bilimlarimni Cambridge IELTS kitoblari va YouTubeʼdagi darsliklar, qoʻllanmalar orqali mustahkamlab, imtihonlardan oʻtganman”, – deydi u.

Asilbek maktabning eng aʼlochi oʻquvchilaridan. Darsdan tashqari maktab toʻgaraklarida doimiy faol qatnashgan, oʻzi oʻqiyotgan Prezident maktabida “maktab prezidenti” lavozimida ishlaydi. Bu lavozimga nomzod bilimli, lider oʻquvchilar orasidan ovoz berish usuli orqali saylanadi, rahbariyatga oʻquvchilarning muammolari, takliflarini yetkazadi. Asilbek shuningdek, oʻzbekistonlik taniqli iqtisodchi Behzod Hoshimov boshchiligidagi tadqiqotda yordamchi sifatida ishlagan.

Asilbek Chikago universitetining bakalavriat bosqichiga Oʻzbekiston fuqarosi sifatida oʻqishga qabul qilingan va toʻliq grantni qoʻlga kiritgan birinchi talaba boʻldi. Meni quvontirgani suhbat yakunida Asilbek oʻqishni tamomlagach vatanga qaytib, iqtisodiy sektorda ishlar, loyihalar qilmoqchi ekanligi. U oʻz kelajagini Oʻzbekistonda koʻrmoqda, yurt bilan bogʻlamoqda. Davlatimiz rahbari taʼkidlaganidek, millatparvar kadrlar, yoshlarimiz koʻpaysa rivojlanish boʻladi.

Maktablarimizda iqtidorli, bilimli yoshlarimiz juda koʻp. Bizdan hali koʻp Asilbek kabi “birinchi”lar chiqadi, chiqmoqda ham. Suhbatni barcha oʻquvchilar, Asilbekning tengdoshlari, u kabi yutuqlarga erishishni istaydigan yoshlarga tavsiya qilaman.

@hilola_umarova

Hurmatli maktabgacha va maktab ta’limi tizimida mehnat qilayotgan ayol-qizlarimiz,
aziz ustozlar!

Sizlarni bahor ayyomi — “8-mart — Xalqaro xotin-qizlar kuni” bayrami bilan samimiy qutlayman.

Bugungi kunda yurtimizda ayol-qizlarimiz uchun ko‘plab imkoniyatlar yaratib berilmoqda. Har bir sohada ularning o‘z maqsadi tomon dadil ildamlayotganini ko‘rish esa insonga behad quvonch bag’ishlaydi.

Shu o’rinda, yurtimizda qizlarimizning ilm olishi uchun ham alohida e'tibor qaratilayotganini ta’kidlash joiz. Shubhasiz, qiz bolaga ta’lim berish butun millatga ta‘lim berish demakdir.

Fursatdan foydalanib, barchangizni go‘zallik bayrami — 8-mart bilan yana bir bor samimiy tabriklayman. Sihat-salomatlik, baxt-u saodat, xonadoningizga fayz-u baraka yor bo‘lishini tilayman.

Zafar va muvaffaqiyatlar yo‘lingizda hamisha hamroh bo‘lsin!

Bayramingiz muborak bo‘lsin!

Hilola Umarova,
Maktabgacha va maktab ta’limi vaziri

@hilola_umarova

Bugun millionlab opa-singillarimiz qatori men uchun chinakam bayramona kun bo‘ldi.

Ko‘ksaroy qarorgohida Xalqaro xotin-qizlar kuni munosabati bilan tashkil etilgan tadbirda Davlatimiz rahbarining samimiy tabrikalarini tingladik. Yangi O‘zbekiston rivoji yo‘lida sidqidildan xizmat qilayotgan xotin-qizlar davlat mukofotlari bilan taqdirlandi.

Bu yil Zulfiya mukofotiga munosib topilganlar orasida “Yangi O‘zbekiston” universitetining sanoat boshqaruvi mutaxassisligi bo‘yicha magistranti Ummatoy Yo‘ldosheva ham borligi quvonchimni ikki karra oshirdi.

Ummatoy erishgan yutuqlarni ko‘rib uning yoshlik davri yodimga tushdi. Esimda, o‘shanda uni INXА universitetida aynan Kompyuter fanlari va muhandisligi yo‘nalishida o‘qishga undagandim. Boshida onasi ikkilanibroq rozi bo‘lgandi.

Vaqt o‘tgan sari Ummatoyning IT sohasida erishayotgan muvaffaqiyatlari o‘shanda to‘gʼri qaror qabul qilganini tasdiqlab boryapti.

Uning ko‘ksiga mukofot taqilganda ko‘zimga beixtiyor sevinch yoshlari keldi… Uning Davlatimiz rahbari tomonidan Kambag’allikni qisqartirish va bandlik vaziriga maslahatchi sifatida tavsiya qilinganligi esa, quvonchimga quvonch qo‘shdi. Shubhasiz, bu yuksak ishonch va e’tirof demakdir.

Bugun “Yangi O‘zbekiston” universitetida Ummatoy bilan yana birgamiz.

Ummatoyga va uning timsolida minglab singillarimning kelgusi faoliyatida davomli zafarlar tilab qolaman.

@hilola_umarova

#muloqot

Bugun maktabgacha taʼlimga masʼullar bilan keng masshtabda yigʻilish oʻtkazdik. Muloqotimizda markaziy va hududiy studiyalardan respublikamizdagi 38 mingdan ortiq davlat va nodavlat maktabgacha taʼlim tashkilotlari rahbarlari ishtirok etdi. Muloqotda MTTdagi holatlar, muammolar, ularni oldini olish haqida gaplashdik.

Soʻnggi yillarda maktabgacha taʼlim sohasiga berilgan katta eʼtibor natijasida bogʻchalar soni 8 barobarga oshib, 38 mingdan ortdi va bolalarning qamrov darajasi 2017-yildagi 27 foizdan 77 foizga yetkazildi. Tashkil etilgan bogʻchalarning qariyb 7 mingtasi davlat bogʻchasi boʻlsa, qolgan 31 mingdan ortigʻi nodavlat bogʻchalar hisoblanadi. Nodavlat bogʻchalarda hozirda qariyb 1 millionga yaqin bolalarimiz tarbiyalanmoqda.

Afsuski, muammolar ham yoʻq emas. Kunora ijtimoiy tarmoqlarda bogʻchalarda ayrim tarbiyachilar tomonidan bolajonlarga nisbatan ishlatilgan qoʻpollik, tarbiyasizlik holatlari aks etgan videolavha va turli xabarlar tarqatilmoqda. Birgina oʻtgan yilning oʻzida ayni shu masalada vazirlikka yuzlab murojaatlar kelib tushgan. Biz bunday vaziyatlarni tizimli oʻrganib, nazoratga olyapmiz. Aslo befarq emasmiz. Oʻrganishlar natijasida 32 nafar rahbar va tarbiyachi lavozimidan ozod etildi, 3 nafari javobgarlikka tortildi, 15 nafariga intizomiy chora koʻrildi, 15 ta xususiy bogʻchaga berilgan litsenziya bekor qilindi.

Yigʻilishda aytilganidek, bir muhim jihatni unutmaylik: biz kelajagimizni bilimli, dunyoqarashi keng va mustaqil fikrlaydigan yoshlar bilan tasavvur qilamiz. Bola bilan munosabatda boʻlayotgan har bir mutaxassis mana shu masʼuliyatni his qilishi lozim. Har bir bolaning sogʻlom va barkamol voyaga yetishiga davlat kafil! Bu xususiymi, davlat va xususiy sheriklikmi yoki oilaviy bogʻcha boʻladimi, qonun talabi, tartiblar hamma uchun bir!

Taʼlim-tarbiya kuch ishlatishdan holi boʻlishi lozim. Bolalarga nisbatan qoʻpollik qilgan yoki shafqatsizlarcha munosabatda boʻlgan tarbiyachi, pedagogga qonun doirasida chora koʻriladi. Uzr, ogohlantirishlar bilan qutilib qolish yoʻq, bu oʻrinda MTT rahbariyatining shaxsiy javobgarligini ham kuchaytiramiz. Buni tizimda ishlayotgan har bir rahbar, pedagog, tarbiyachi va yordamchi xodimlar birdek tushunishi, shu tartibga rioya etishlari shart!

Yigʻilishda faol rahbarlar tomonidan bildirilgan har bir muammo, takliflarni yozib oldik, muammolarni hal etish, tashabbuslarni amalga oshirish boʻyicha ishni esa allaqachon boshladik. Biz bunday formatdagi uchrashuvlarni yana tashkil etib boramiz. Jamoamiz taklif va muammolarni eshitishga hamisha tayyor.

@hilola_umarova

Diqqat, iqtidorlilar saralanadi!

✅ Maktabgacha va maktab ta’limi vazirligi tomonidan mamlakatimizda ILK MAROTOBA “Iqtidor” maktab ansambli Respublika tanlovi o’tkaziladi.

➖ Maqsadimiz — umumiy o‘rta ta’lim maktablaridagi ansambllar faoliyatini qo‘llab-quvvatlash orqali hududlarda milliy cholg‘uchilik san’atini rivojlantirishdan iborat.

Tanlov 6-10-sinf o‘quvchilari o‘rtasida milliy cholg‘ular yo‘nalishida aprel oyida o‘tkaziladi.

✈️Respublika bosqichida g‘oliblikni qo‘lga kiritgan maktab ansambli xorijiy mamlakatga ta’lim sayohatini qo‘lga kiritadi.

➡️ Tanlovda ishtirok etish uchun quyidagi telegram bot orqali ro‘yxatdan o‘ting: @iqtidoransambli_bot

TANLOV NIZOMI

🎵 Batafsil ma’lumotlarni vazirlikning rasmiy kanali va @maktabtanlovlari manzili orqali kuzatib boring.

@hilola_umarova

Oʻzbekiston Respublikasi Prezidenti “Zulfiya nomidagi Davlat mukofoti bilan taqdirlash toʻgʻrisida”gi Qarorni imzoladi.

Mukofot bilan taqdirlanganlar orasida maktabgacha va maktab taʼlimi vazirligi tizimi, Yangi Oʻzbekiston universiteti jamoasi aʼzolari ham bor:

Yoʻldosheva Ummatoy Toʻlqinovna — “Yangi Oʻzbekiston” universitetining sanoat boshqaruvi mutaxassisligi boʻyicha 1-bosqich magistranti (Navoiy viloyati);

Xamdamova Afroʻza Akbarovna — Samarqand viloyati, Samarqand shahridagi 42-umumiy oʻrta taʼlim maktabining 9-sinf oʻquvchisi;

Anvarova Naima Anvar qizi — Toshkent viloyati, Chinoz tumanidagi 7-umumiy oʻrta taʼlim maktabining ona tili va adabiyot fani oʻqituvchisi;

Kamalova Shaxzoda Kaxramon qizi — Xorazm viloyati, Urganch shahridagi 3-ixtisoslashtirilgan umumiy oʻrta taʼlim maktabining 11-sinf oʻquvchisi.

Barcha sovrindorlarni samimiy tabriklayman, yutuqlaringiz davomli boʻlsin!

@hilola_umarova