🌴سكينة|| Sakiynat

Hammasiga ulgurmaysiz

Hayotda har narsa muvozanatda bo‘lishi kerak, deyishadi. Lekin bu gapni har safar eshitganimda, nimagadir ichimda qarshilik tug‘iladi.

Ham yaxshi ota bo‘laman, ham yaxshi do‘st, ham zo‘r mutaxassis, ham sog‘lig‘imni yaxshi saqlayman, ham shaxsiy o‘sishga vaqt topaman, ham jismoniy forma, ham ruhiy tinchlik, ham vaqtida uxlash, ham doimiy o‘qish...
Yaxshi, qanday qilib?

Bu yerda muammo illyuziya. Go‘yo bariga ulgurish mumkin. Aslida esa siz har doim bir narsani tanlayapsiz va boshqa narsalarni vaqtincha qurbon qilayapsiz.

Hayot bu doimiy muvozanat emas. Hayot bu diqqatni taqsimlash.

Kasbingizda chuqur ildiz otmoqchimisiz? Unda vaqtincha do‘stlar bilan ko‘rishish kamayadi.
Farzandlaringizga ko‘proq vaqt bermoqchimisiz? Demak ishdagi yutuqlaringiz sekinlashadi.
Sog‘lig‘ingizni tiklamoqchimisiz? Qaysidir loyihalardan voz kechishga to‘g‘ri keladi.

Bu yomon emas. Bu real hayot. Har bir ish ortida, ko‘rinmas tanlovlar yotadi.

Qurbonlik bu yo‘qotish emas, yo‘l tanlash.

Va bu tanlovlar doimiy bo‘lmaydi. Hayotning turli bosqichlarida e’tibor markazi o‘zgaradi. Siz ham o‘zgarasiz.

Bu haqda biz Maqsad Club'idagi “Kechiktirilgan mukofot” darsida gaplashgan edik:
“Hayotda hechkim hammasiga ulgurmaydi, lekin har kim o‘z maqsadiga diqqatni vaqtincha to‘plab, kerakli qurbonlikni qila oladi.”

Bugun o‘zingizga bitta savol bering: "Men hozir nima evaziga nima olyapman? Bu tanlov men xohlagan kelajak sari olib boryaptimi?"

Chunki tanlovlar vaqtinchalik, lekin ularning natijasi doimiy.

@abdusattor

Kamroq narsa ko‘proq erkinlik.

Zamon ortiqcha narsalar bilan to‘lgan davrdamiz. Ko‘proq kiyim, ko‘proq gadjet, ko‘proq ma’lumot, ko‘proq tanlov...
Ammo bu ko‘proq ortida ko‘proq charchoq, chalkashlik va ichki siqilish yashirinadi.

Minimalizm hech narsaga ega bo‘lmaslik emas. Bu keraksizlardan voz kechib, muhim narsalar uchun joy ochishdir.

Har bir ortiqcha buyum o‘tmishda qolgan versiyaga bog‘lovchi zanjirdir. Har bir bildirishnoma ongni bo‘lib, e’tiborni o‘g‘irlaydigan shovqindir.

Minimalizm bu zamonaviy "qarshilik" falsafasi. Biz sotib olishga majbur bo‘lgan illuziyalardan ozod bo‘lsak, o‘zimizga qaytamiz.

Tashqi tartib ichki holatga ta’sir qiladi. Kamroq narsalar orasida yashay olish shukr qilishni o‘rgatadi. Shukr qilingan ong esa tinchlikka yaqinlashadi.

Kam narsa orqali ko‘proq ong, ko‘proq erkinlik va ko‘proq hayot kashf etiladi.

Manba : @abdusattor

@Sakiynah_tv