Rasmiy munosabat: 200 gektardagi bog‘da ko‘chatlar unib, yaxshi parvarishlanmoqdaSo‘nggi kunlarda ijtimoiy tarmoqlarda Surxondaryo viloyatiga oid asossiz ma’lumotlar tarqatilmoqda. Jumladan, qumqo‘rg‘onlik Shoberdi Suyunov va o‘zini ekologiya vakili deb tanishtirgan To‘raxon ismli shaxs murojaati asosida
Qumqo‘rg‘on va Sho‘rchi tumanlarida yerlar sotilgani iddao qilingan.
Mazkur holat yuzasidan mutasaddi boshqarmalardan iborat Ishchi guruh tekshiruv o‘tkazdi. Natijada murojaatda ko‘tarilgan holatlar tasdiqlanmadi, aksincha, jamoatchilikni chalg‘itish va shaxslarning sha’ni hamda qadr-qimmatiga tahdid holatlari aniqlandi.
Shuningdek, yangi tashkil etilgan bog‘lar qurib ketgani va bunga tadbirkorlar majburlangani haqidagi ma’lumotlar ham haqiqatga to‘g‘ri kelmaydi. Aslida, Surxondaryo viloyatida tadbirkorlar tashabbusi bilan
"Metanchilar bog‘i" loyihalari amalga oshirilmoqda. Denov tumanidagi "Sobir Raximov" SIU hududida
200 gektar yerda 32 mingdan ziyod mevali va manzarali ko‘chatlar ekilgan, sug‘orish tizimi yo‘lga qo‘yilgan va parvarish ishlari davom etmoqda. Buning tasdig‘i sifatida tegishli fotofaktlar ham ilova qilingan.
Yana bir gap: viloyatda yuz bergan barcha qonunbuzilishni viloyat rahbari bilan bog‘lash ham insofdan emas. Masalan, davlat o‘rmon fondiga tegishli yerda noqonuniy qurilish bo‘lsa yoki o‘zlashtirilsa, bu holatni aqli raso inson viloyat rahbari bilan bog‘lashni o‘ziga ep bilmaydi. Iddoada keltirilgan holatlar o‘rganilganida,
➖Qumqo‘rg‘on tumani hududida davlat o‘rmon fondiga mansub yer maydonlarida ayrim fuqarolar tomonidan
ruxsatnomasiz tartibda issiqxona va baliqchilik xo‘jaliklari tashkil etilgani, vaqtincha turarjoy binolari va molxonalar qurilgani;
➖Fermer xo‘jaliklari tomonidan davlat o‘rmon fondi yerlarida jami
26,9 gektar maydonda (2,0 ga + 2,0 ga + 0,7 ga + 6,0 ga + 8,3 ga + 8,2 ga + 0,7 ga) paxta va g‘alla mahsulotlari yetishtirish ishlari amalga oshirilgani;
➖Hisor ixtisoslashgan davlat o‘rmon xo‘jaligi Surxon sohili bo‘limiga qarashli yer maydonida —
1,8 gektar maydonda qum-shag‘al olib chiqilgani va unimdor tuproq bilan tekislash ishlari olib borilgani;
➖Davlat o‘rmon fondida ayrim fuqarolar tomonidan qishloq xo‘jaligi mahsulotlari noqonuniy ravishda yetishtirilayotgani;
➖2024-yilda 36 nafar fuqaro bilan qog‘oz shaklida ijara shartnomalari rasmiylashtirilgani, ammo "E-ijara" axborot tizimida davlat ro‘yxatidan o‘tkazilmagani;
➖Qirg‘oq hududlarida ildizbob daraxt va butalar ekish ishlari to‘liq amalga oshirilmagani aniqlangan. Bu harakatlar uchun viloyat hokimi biron kishiga og‘zaki yoki yozma ko‘rsatma bermagan.
Biroq,
murojaatda bayon etilgan ko‘pgina holatlar haqiqatga yaqin emas. Ayrim holatlar yoki qonunbuzilishlar mavjud bo‘lgan bo‘lsa-da, murojaatda ular asossiz tarzda bo‘rttirilgan va umumiy holat haqida noto‘g‘ri tasavvur uyg‘otishga harakat qilingan. Bu holatlar maxsus o‘rganish orqali aniqlangan va hujjatlashtirilib, tegishli tartibda baho berish uchun huquqni muhofaza qiluvchi organlarga taqdim etilgan.
Shu munosabat bilan, ommaviy axborot vositalari va fuqarolardan faqat haqqoniy ma’lumot tarqatish, asossiz xabarlardan saqlanish so‘raladi. Eslatib o‘tamiz, qonunchilikka muvofiq yolg‘on ma’lumot tarqatish uchun javobgarlik belgilangan.
Surxondaryo.uz |
Telegram |
Facebook |
Instagram |
YouTube |
X
