Davlatimiz rahbarining Surxondaryo viloyatiga 2023-yil 16-17-noyabr kunlari bo‘lgan tashrifida yo‘l infratuzilmasini rivojlantirish bo‘yicha qator vazifalar belgilab berilgan edi. Xususan, vohamizning 7 ta hududidan o‘tuvchi davlat ahamiyatidagi 4R100 avtomobil yo‘lining 92,7 km qismiga asfalt-beton qoplamasi yotqizish loyihasiga 95,6 mlrd so‘m mablag‘ ajratildi.

Viloyat Avtomobil yo‘llari boshqarmasi tasarrufidagi 7 ta pudratchi korxonalari tomonidan mazkur loyiha amalga oshirilib, rekonstruksiya ishlari to‘liq yakunlandi. Bugun mazkur yo‘l xalqimizga xizmat qilish uchun topshirildi.

Tadbirda Surxondaryo viloyati hokimi Ulug‘bek Qosimov ishtirok etib, Prezidentimiz topshirig‘i bilan vohamizda yo‘l infratuzilmasini yaxshilash bo‘yicha yirik loyihalar amalga oshirilayotganligini, xalqimizning og‘irini yengil qiluvchi, uzog‘ini yaqin qiluvchi ushbu yo‘l ham mazkur chora-tadbirlar doirasida amalga oshirilganligini ta’kidladi. Viloyat rahbari yo‘lsozlarimizning mashaqqatli mehnatlari uchun minnatdorchilik bildirib, Konstitutsiyamizning o‘ttiz ikki yilligi bayrami bilan barchani tabrikladi.

Shuningdek, tadbirda shahar va tumanlar Yo‘llardan foydalanish davlat muassasalarining moddiy-texnika bazasini mustahkamlash, ta’minotini yaxshilash maqsadida yo‘l xo‘jaligida foydalanish uchun maxsus va yuk transportlari topshirildi.

Telegram | Facebook | Instagram | YouTube | Web-site | X