YONIMDA SIZ BOʻLSANGIZ ONA

Hamroh yurgan yoʻlimda har on,
Duoingiz jonimga qalqon.
Togʻu toshni qilaman talqon,
Yonimda siz boʻlsangiz ona.

Tashvish mendan yuzin buradi,
Ishlarim ham oson yuradi.
Doim koʻnglim toʻlib turadi,
Yonimda siz boʻlsangiz ona.

Dunyoda eng boyga oʻxshayman,
Xizmatingiz qilishga shayman...
Rosa mazza qilib yashayman,
Yonimda siz boʻlsangiz ona.

Goʻzal jannat iforim manim,
Hammadan begʻuborim manim.
Toʻrt fasl ham bahorim manim,
Yonimda siz boʻlsangiz ona.

Xonadonim toʻladi nurga,
Oʻrnaksiz har farishta hurga...
Hali hoji boʻlamiz birga,
Yonimda siz boʻlsangiz ona.

Osmonlarga yetadi qoʻlim,
Chirogʻimsiz porlaydi yoʻlim.
Meni yoʻqlab kelmaydi oʻlim,
Yonimda siz boʻlsangiz ona.

Hamma joyda oʻtadi soʻzim,
Hammadan zoʻr boʻlaman oʻzim.
Dadam bilan quvnatib koʻzim,
Yonimda siz boʻlsangiz ona.

✍ Odilbek Qodirov

❤️ 𝗞𝗮𝗻𝗮𝗹 | 𝙾𝚍𝚒𝚕𝚋𝚎𝚔 𝚀𝚘𝚍𝚒𝚛𝚘𝚟