⚖️ Yurist Muhammadali Muyassarov blogi

⚡️NOSHUKRLIK QILMANG, OZGINA OʻYLANG!

Uygʻonmagan qancha bilmaydi hech kim,
Saharda uygʻonib, koʻz ochdik shukr.
Qora mayiz bilan, novvot-bol bilan,
Tinch nonushta qilmoq qanchalar huzur.

Koʻrdik charaqlagan bobo quyoshni,
Goh yozda qiziymiz, goh yashnar bahor.
Kapalak raqsini, maysa rangini,
Umrida bir bora koʻrmaganlar bor.

Yurib charchadingiz, toliqdingizmi,
Noshukrlik qilmang, ozgina oʻylang.
Oyoq kiyimi bor, ammo kiyishga,
Oyogʻi yoʻqlarning holini soʻrang.

Libosingiz yoqmay jigʻibiyronsiz,
Kiyim koʻpligidan yotar qalashib. 
Doʻppi topilar, deb jon qaygʻusida,
Tentiydi qashshoqlar ushoq talashib.

Bolalar uyida gʻarib goʻdaklar,
Zor yurar bir marta “ona” deyishga.
Ikkita issiq non oling-da, darrov,
Boring onangizni koʻrib kelishga. 

Sizni bugun ishdan boʻshatishdimi,
Shumi tashvishingiz, shumi muammo?
Qarang, oʻz uyini boʻshatib qoʻyib
Muhojirlar yigʻlar, Vatandan judo.

Orzu-havas koʻrmay oʻtayapman, deb,
Noliyapsiz, balki ogʻrinayapsiz.
Qaydadir ochlikdan qirilyapti xalq,
Suv, deb yigʻlayapti, eshitmayapsiz ...

Oʻgʻlingiz shifokor boʻladi bugun,
Uni quchoqlaysiz gʻururga toʻlib.
Qaydadir bir ayol oʻksib, dod solar,
Bola yoʻq beshikka boshini qoʻyib …

Oxirgi pulni ham ishlatdingizmi? 
Xudo yetkazadi banda rizqini.
Umr tilang, xasta bemorlarga siz, 
Bugun kimlarningdir oxirgi kuni.

Boriga shukur, deng yoʻgʻiga sabr,
Choyxonaga chiqing, kutar ulfatlar.
Toʻylarga borasiz chiroyli boʻlib,
Qoʻlingizga toʻlib ketgan toʻyxatlar.

Togʻ desangiz togʻ bor, bogʻ  desangiz bogʻ,
Daryolar mavj urar, har tomon yashnar.
Toʻlib-toshib yotar toʻkin bozorlar,
Kim nima izlasa oʻshani topar. 

Doim sergak turing va ahil boʻling,
Vatanni avaylang toʻrtta tomonda.
Yana bir chiroyli tong yorishmoqda,
Baxtiyorlar yurti Oʻzbekistonda!


📝 Telegram |💻 Instagram |🎞 Youtube |📝 Facebook

•Yuridik maslahat olish uchun muhokama guruhimizga oʻting:
@muhammadali_muyassarov_chat