Mayli yomgʻir, mayli qor boʻlsin,
Siz tomonga chorlar qadamlar.
Qayda boʻlsin, faqat bor boʻlsin,
Meni yaxshi koʻrgan odamlar!

Siz borsizki kichik, yirikman,
Siz borsizki bilinmas kamlar.
Axir siz tufayli tirikman,
Meni yaxshi koʻrgan odamlar!

Koʻrdim qancha qaygʻuyu bazm,
Qoldimi men koʻrmagan damlar!
Bugun sizga qilaman taʼzim,
Meni yaxshi koʻrgan odamlar!

Ana dunyo - kim or, kim beor,
Kimdir kimga soʻrar alamlar.
Siz borsizki Xudo menga yor,
Meni yaxshi koʻrgan odamlar!

Mayli kengdir,mayli tor boʻlsin,
Siz tufayli koʻrinmas gʻamlar.
Qayda boʻlsin, Xudo yor boʻlsin,
Meni yaxshi koʻrgan odamlar!