Yana eski yilni ortda qoldirib,
Ildam qadam tashlab o'tar umrimiz,
Yangi niyat, toza baxtga ko'milib,
Orzular bag'rida oqar umrimiz...

Kimdir qadr topdi, bordir tonganlar,
Kimlardir chin orzu taftidan yondi,
Kimdir baxtin topdi, baxtli yuraklar,
Barcha xotiralar o'tmishda qoldi...

Bir yilga ulg'aydik, ildam qadamlar,
Omad yo'llarida mayoq olgaymiz,
Berilar oq qog'oz, rangli bo'yoqlar,
Yangi kunlar uchun surat chizgaymiz...

Har yil takrorlanar xuddi shu tarzda
Har yil umrimizning bir xazon bargi,
Biz chizgan suratlar so'nggi manzilda,
Yillar ko'zgusidir, umrimiz qadri...

Eski yil tashakkur barchasi uchun,
G'aming ham shodliging hayot sabog'i,
Sen bilan boshlanib, senladir yakun,
Har toza niyatning bo'lding tumori...

Yangi yil, xush kelsin niyatlar uchun,
Barcha yaxshilikni dilga jo etsin,
Eng toza niyatlar yozilsin bugun,
Baxtdan bezatilgan yil bo'lib qolsin.

Yana eski yilni ortda qoldirib,
Ildam qadam tashlab o'tar umrimiz,
Yangi niyat toza baxtga ko'milib,
Orzular bag'rida oqar umrimiz...