MENGA MA’KUL 🇺🇿🇺🇿🇺🇿

Nega O‘zbekiston qonunchiligi rivojlanishimizga to‘sqinlik qilmoqda?

Yaqinda Buxoroda 17 yoshli bola kriptovalyuta orqali 3 million dollar atrofida daromad qilgani uchun jinoiy javobgarlikka tortilganligi haqida xabar tarqaldi. Haqiqatan ham, O’zbekiston Jinoyat kodeksining 278-8-moddasiga binoan, kriptoaktivlar aylanmasi bilan shug‘ullanish jinoiy javobgarlikka olib keladi.

O‘ylab qaralsa, bu holat bizning o‘sha eski "Valyutani tartibga solish to‘g‘risida"gi qonunimizni eslatadi. Aynan shu qonun tufayli, 2017-yilgacha bozor va Markaziy bankning valyuta kurslari sun’iy ravishda farqlangan. O‘sha davrda so‘mni tashqi valyutaga rasmiy ravishda aylantirishning deyarli imkoni yo‘q edi. Shu sababli, O‘zbekiston sarmoya kiritish uchun nomaqbul davlat deb hisoblangan. Bundan tashqari, import va eksport qilish ham tadbirkorlar uchun qiyin masala bo‘lgan.

Yuqoridagi muammolarning barchasi davlatning regulyatsiya siyosati sababli yuzaga kelgan edi. 2017-yilda konvertatsiya to'siqlarini olib tashlanishi ushbu sun’iy yaratilgan muammolarni osongina hal qildi.

Biz uchun yechim — shu kabi keraksiz regulyatsiyalarni yo‘q qilish. Kriptovalyutaga oid modda ham shu toifaga kiradi.

Kriptovalyuta bo‘yicha qonunni valyutaga oid qonunlar bilan solishtirayotganimning asosiy sababi shundaki, kripto — bu kelajak. Hozirning o‘zida ham VISA va MasterCard orqali amalga oshirilinadigan umumiy tranzaksiyalarning hajmi bitta Bitcoinning tranzaksiyalar hajmiga tenglashmaydi. Agar boshqa kriptovalyutalarni ham hisobga olsak, bu trillion dollarlik bozorga aylanadi.

Bu O‘zbekiston kabi o‘sayotgan davlatlar uchun juda katta imkoniyat, ko‘plab tadbirkorlar uchun yangi sektor hisoblanadi. Va eng muhimi, oldingi postlarda aytganimdek, O‘zbekiston uchun IT sektori qanday katta imkoniyat bo‘lsa, kriptovalyuta ham shunday ulkan imkoniyatdir.

Qonunchiligimiz va regulyatsiyalarimiz sababli o‘zimizning oyog‘imizga o‘zimiz bolta urmoqdamiz. O‘sha buxorolik yigit mamlakatga 3 million dollar atrofida pul olib kirsa-yu, uni taqdirlash o‘rniga qamab qo‘ysak, bu bizning qonunlarimizning 21-asr talablariga mos emasligidan dalolatdir.

@req404