"1993 йили Наманган вилояти билан мусобақадош бўлдик.

Наманган вилояти ҳокими Бургутали ака Рафиғалиев Наманганда аҳвол оғир бўлган пайтда ҳоким қилиб тайинланган эди. У Наманганда осойишталик ўрнатишда кўп хизмат қилган ва Президентимиз ҳурматига сазовор бўлган ҳокимлардан эди.

Бизни Наманганликлар катта тантаналар билан кутиб олдилар, қаерга борсак, Хоразм куйлари ва қўшиқлари янграб турди. Наманганда кўзга кўринарли ишлар кўп қилинган экан. Мева, узумни қайта ишлаш яхши йўлга қўйилгани эътиборимизни тортди.

Наманганликлар бизга картошка уруғи етказиб бердилар, биз Наманганликларни гуруч билан таъминладик. Борди-келдимиз яхшиланиб, Наманганликлар Мингбулоқ туманида "Хоразм" совхозини барпо этдилар. Биз Тупроққалъадаги энг катта совхозлардан бирига "Мирзо Машраб" номини бердик.

Бундай чора-тадбирлар нафақат қишлоқ хўжалиги, балки барча соҳани ривожлантиришда ижобий рол ўйнади.

Бургутали ака оламдан ёшроқ ўтди. Бугун у кишининг номини Наманганда ҳам, Хоразмда ҳам катта ҳурмат билан тилга оладилар".