Transport vositalarini taqqoslaydigan mashhur bir surat bor. Yuqoriga ham qo'ydim. Suratda 69 kishini mashinalar, avtobuslar, tramvaylar va velosipedlar yordamida tashish uchun qancha joy kerak bo‘lishi ko‘rsatilgan. Bu rasm ko‘pincha transport haqida gap ketganda keltiriladi, chunki u jamoat transportining afzalliklarini va shaharlarda shaxsiy avtomobillar joyni qanday band qilib qo‘yishini yaqqol ochib bera olgan.

Toshkentda oxirgi yillarda shakllanib kelayotgan transport muammolari boshqa davlatlar uchun yangilik emas. Yaqinda AQShning 1920-yillariga oid shu muammoni ko'targan rasmlarni ko‘rib qoldim. O‘sha davrda AQShda tramvay tizimlari yo‘q qilinib, avtomobil yo‘llari qurish uchun mahallalar buzilgan. Bunga qarshi chiqqan faollar, mashinalar va tramvaylar yordamida odamlarni tashishning narxini taqqoslagan ekan.

Bugungi kunda AQShda bu muammolar davom etmoqda. Urbanistlar va faollar hanuzgacha tramvayning afzalliklarini va yangi yo‘l qurish shaharlarga foyda keltirmasligini tushuntirishga harakat qilishmoqda. Lekin AQSh yo'llari allaqachon shaxsiy avtomobillar uchun qulay ko'rinishga keltirib bo'lingan. Biz esa bunday xatolarga yo‘l qo‘ymasdan, jamoat transportini rivojlantirish orqali shaharlardagi tirbandlik muammosini hal qilish imkoniga egamiz deb o'ylayman. Sababi esa biz yo'lning boshidamiz.

@lazizhamidov