BOSHQA KOʻZ

Yashasang ham oʻzingga qarab,
Kiprik qoqmay boqar boshqa koʻz.
Senga erish tuyular, yo Rab,
Boshqalarga yoqar boshqa koʻz!..

U — agʻyormi, hamkormi — bilmam,
Nigohida qahru mehr jam:
Ishingni ming puxta qilsang ham:
Xatoingni uqar boshqa koʻz!

Vujudingga koʻzlaring soqchi,
Toliqasan, tun bor, aytmoqchi,
Uxlasang kim boʻlar poyloqchi?!
Kun-tun bedor qarar boshqa koʻz…

Mudraganda ayni muddao —
Birdan ogoh aylar mutlaqo.
Iting yangligʻ sodiqdir goho,
Goh “tanimay qopar” boshqa koʻz.

Koʻzingga choʻp tushar — ayasang,
Ayamasang — ochasan arang.
Voh, gʻizillab keta boshlasang
Ortda qolmay chopar boshqa koʻz.

Savobing ham, gunohing ham — tan,
Qutulmaysan oʻlmasang, chindan.
Hech qiynalmay, pishiq izingdan
Talay nuqson topar boshqa koʻz!..