Oliy ta'lim, fan va innovatsiyalar vazirligi telegram kanali tarqatgan mana bu xabar meni xavotirga soldi. Xabarda vazirning Toshkent shahridagi Singapur menejmentni rivojlantirish instituti rektori axbororini tinglagani aytiladi. "Dastlab, institutga biriktirilgan Toshkent viloyatining Bo‘stonliq, Parkent va Ohangaron tumanlari hamda Angren shahrining turistik salohiyatini rivojlantirish borasida olib borilayotgan ishlar haqida ma’lumot berildi. Shu o‘rinda, vazir tomonidan mahalla fuqarolar yig‘ini mas’ullari bilan hamkorlik o‘rnatish, tur agentliklari faoliyatini takomillashtirish yuzasidan takliflar bildirildi. Hududning turistik salohiyati haqida keng ommani xabardor qilish, ko‘proq targ‘ibot-tashviqot ishlarini olib borish haqida ham to‘xtalindi", deyiladi xabarda.

Bu xabarning nimasi xavotirli, deyishingiz mumkin. Xavotirli joyi shundaki, Toshkent shahridagi Singapur menejmentni rivojlantirish instituti - nodavlat oliy ta'lim muassasasi (buni "ma'muriy islohotlar" deya nomlangan jarayonda tugatilgan Ta'lim sifatini nazorat qilish davlat inspeksiyasi saytidan ham ko'rish mumkin).

Qandaydir hududlarni universitetlarga biriktirish, mahalla oqsoqollarini jalb qilish, tashviqot singari oliy taʼlimning maqsad va vazifalariga umuman aloqasi yoʻq, davlat oliy taʼlim muassasalarini kemirayotgan (balki kemirib boʻlgan?) yondashuvlarning nodavlat oliy taʼlimga ham tadbiq qilinayotgani xavotirli. Bu ham "maʼmuriy islohotlar" deya taqdim qilingan jarayonlarning mevalaridan biri boʻlsa kerak.