Ҳумоюн

Брендлар учун матн ёзганда доставка сўзининг ўзбекча муқобилини тополмай қийналаман. Филолог Шаҳноза Соатова етказма сўзини таклиф қилмоқда. Менга ёқди. Сабабини тушунтираман.

Сўнгги йилларда етказиб бериш хизмати ривожланиши ортидан доставка сўзи оммалашиб кетди. Аслида аксарият тилшунослар бу сўзнинг таржимаси сифатида жўнатма сўзини илгари суради.

Лекин жўнатмоқ феъли доставканинг маъносини тўла очиб беролмайди. Яъни бунда маҳсулот фақат жўнатилади, иккинчи томонга етказишни назарда тутмайди. Шу сабабли етказма варианти маъқул деб ўйлайман ва энди матн ёзишда шу сўздан фойдаланаман.

Фанлар академиясида бўлиб ўтган учрашувда, бундан ташқари, яна бир нечта сўзларга муқобил топиш ва қўллаш масаласи муҳокама қилинган. Унга кўра, ходунок учун юрмачоқ, аванс учун бўнак, скрепка учун қистирги ва неустойка учун айбона вариантлари илгари сурилган.

@humoyun

Байрам олди уйга қайтаётгандим. Самарқанддан поездга ҳиндистонлик йигит чиқди ва ёнимдаги ўриндиққа ўтирди. Уни вокзалда ўзбек қизи кузатиб қўйгани этиборимни тортди. Кейин ўртада суҳбат бошланиб кетди, инглиз тилида узуқ-юлуқ гапириб, фикрларимни тушунтирдим.

Aйтиши бўйича самарқанддаги тиббиёт олийгоҳини тугатган. Аёли билан ҳам шу ерда танишган. Ҳозир хусусий шифохонада ўзи шифокор, аёли эса унга таржимон бўлиб ишларкан. Бу ерда меҳнатнинг қадрига етишади, даромадим анча яхши дейди.

Шу ҳолатдаги уч жиҳат этиборга лойиқ деб биламан. Биринчидан, биздаги хусусий сектор умидли ва малакали мутахассисларни, у чет эллик бўлса ҳам, ортиқча тўсиқларсиз ишга оляпти. Бу ҳам компания, ҳам ходим ривожланиши учун катта туртки ҳисобланади.

Иккинчи эътиборли жиҳат — йигит ва қизнинг дини, ирқи, миллати бошқа-бошқа бўлишига қарамай, бирга оила қургани. Бунга тоқатли ота-оналар борлиги одамни хурсанд қилади. Ёшларнинг ҳаёти фақат ўзининг қўлида эканини тушунишаётгани қувонарли ҳолат.

Учинчидан, Ўзбекистонда нафақат қора меҳнатда, балки юқори классификация талаб қилинадиган соҳаларда ҳам чет эллик кадрлар ишга жойлашаётгани яхши кутилмаларга етаклайди. Энг камида бу ҳолат бизнинг ҳам ишчи кучи етиштирувчи эмас, иш берувчи мамлакатлар қаторига қўшилишга бироз ёрдам беради.

Шунақа гаплар.

@humoyun

Бугун ҳамма футбол ҳақида ёзяпти. Мен эса Конста ҳақида ёзмоқчиман. Унинг Тошкентдаги охирги концертига тушгандим, қониқарли деган баҳо қўйдим.

Сабабини тушунтираман. Мен муаллифнинг қўшиқларини 10 йилдан бери эшитаман. Шум ёшлигимиз унинг қаторлари билан қизиқарлироқ бўлган. Максимализм юқори эди ўшанда.

Лекин концертда фақат охирги 2 йилликдаги қўшиқлар ижро этилди. Янги альбом премьера қилинди. Бу Конста — халқчил, умуммиллий ғояни илгари сура бошлаган ижодкор. Ўзи ҳозирги пост бу ҳақда эмас.

Умуман олганда, Шариф Абдуллаев исми вақти келиб мусиқа дарсликларига киритилишига ишонаман. У Янги Ўзбекистон тарихидаги энг ёрқин персоналардан бирига айланиб бормоқда. Гап унинг қаторлари ҳаммага ёқишида ҳам эмас.

Констанинг ижод уммони шу қадар кенгки, у бир нечта авлодларни бирлаштира олади. У муаммоларга эътибор қарата олади. У мухлисларни зериктирмайди, у шоу уюштиради. Агар бу хонандамизни ҳам бирор расмий лавозимга бериб қўймасак, ҳали кўп йиллар шедевр асарлардан баҳраманд бўламиз.

@humoyun

Мен муаллифман. Шу сабабли ҳар қандай контентга ижод маҳсули сифатида қарайман ва уни атрофлича таҳлил қиламан. Бугундан бошлаб каналда ўзим сочма таҳлилга муносиб деб топган видео, кинопарча, қўшиқ ва матн (умуман исталган турдаги контент)ни ўрганиб чиқаман. Агар формат менга ва ўқувчиларга маъқул тушса, давом эттирамиз.

@humoyun

Охирги пайтлар «Бу иш мени безитиб юборди» деган гапни жуда кўп эшитяпман.

2-3 йил олдин бу гапдан ҳеч қандай маъно қидирмасдим, ўткинчи ҳиссиёт бўлса керак дердим.

Эсимда, 4-синфда ўқиб юрганимда дадам билан математика фанидан уйга вазифа бажарганмиз. Шунда мен дадамдан ҳаммасини тўғри қиляпманми деб сўрадим.

Дадам эса бир неча дақиқа тин олиб, «Менинг ўзим ҳам нима тўғри ёки нотўғри эканини ҳали билмайман», деди. У пайтларда шунчаки дадам математикани яхши тушунмаса керак деб ўйлагандим, холос.

@humoyun

Мен ҳаётимнинг энг қимматли қисми — ёшлик йилларимни офисдаги ишга сарфлаяпман. Бундан афсусланаманми? Йўқ, албатта.

Бу йўлни босиб ўтмасдан туриб, керакли маррага етиш имконсиз. Ақлимни таниганимдан бери костюм-шимда ўз офисимда аччиқ қаҳва ичиб ўтиришимни тасаввур қилардим.

Аммо менга қаранг, на карьера, на мол-мулк, на таниш-билишим бор. Буни қарангки, ҳатто қаҳва билан ҳам йўлларимиз мос тушмади. Ҳозир ортиқча вазнни йўқотиш учун фақат сув ичяпман.

Унга қара, Instagramʼда минглаб обуначиси бор, ҳар ойда саёҳат қилади, нега менинг ҳаётим аксинча кетмоқда? Буни давлат телевидениесига қиёслаш мумкин. Ҳеч ким ўз ҳаётидаги муаммолар ҳақида камерада гапирмайди.

Биз, одамлар, ахборот билан тўйинган даврда ўз-ўзимизни еб битиришга одатланяпмиз. Контент истеъмоли сабабли узоқ вақт ўтмай, инсон ўзини етарлича чиройли, омадли ва қизиқарли эмасдек ҳис қила бошлайди. Мутахассис сифатида айта оладиган ягона маслаҳатим, камроқ томоша қилинг, кўпроқ ҳаракатланиб, йўлдошларга кўпроқ вақт ажратинг.

@humoyun

Қамоқдан қочиш мумкин, қотилдан ҳам қочса бўлади. Аммо ўзингиздан қочиб қутулолмайсиз.

Ажабланарли даражада содда ва таниш фикр: ҳа, сиз бошқа жойга кўчдингиз, аммо ҳали ҳам ўша-ўша ўзингизсиз. Фақат жойлашув ўзгарди.

Чет элга чиқиш тўғрисидаги паспортдаги муҳр ташвиш ва қўрқувни йўқотмайди, штамп шубҳаларни бартараф этолмайди. Бу шунчаки белги ва сиз бу сиз.

Эҳтимол, ҳар бир кетаётган (қочаётган) одам билиши керак бўлган оддий ҳақиқат бор: ўзгариш учун инсон ўлиб, қайта туғилиши керак. Биз одатларимиз ва қарашларимизни ўлдиришимиз керак.

Қон-қонимизга сингиб кетган одатларни тозалаш лозим. Бунинг учун тери шилиниб кетгунга қадар, гўшт кўриниб қолгунга қадар ишқалаш керак. Ва қайта туғилмоқ лозим. Соф ақл-идрок билан қайта туғилиш.

Фақат шу ҳолатдагина сиз ўзингизни ўзингиз хоҳлагандек ўзгартиришингиз мумкин бўлади. Бошқа мамлакатга кўчиб ўтиш коинот қора туйнугини очмайди. Жисмонан бошқа нуқтага ўтсакда, руҳимиз бир жойда — танамизда қолаверади. Ўзгариш ҳеч қачон осон бўлмайди.