#xalqaro_aloqalar

Oʻzbekiston va Rossiya: neft-gaz taʼlimi sohasidagi hamkorlik istiqbollari

Oʻzbekiston Respublikasi Oliy taʼlim, fan va innovatsiyalar vazirining birinchi oʻrinbosari Shohrux Daliyev boshchiligidagi delegatsiya Moskvadagi I.M. Gubkin nomidagi Rossiya davlat neft va gaz universitetiga tashrif buyurdi. Tashrif doirasida delegatsiyani universitet rektori Viktor Martinov qabul qildi.

Uchrashuv davomida rektor delegatsiya aʼzolariga universitetning taʼlim va ilmiy faoliyati, shuningdek, amalga oshirilayotgan ilmiy tadqiqotlari va loyihalari haqida batafsil maʼlumot berdi. Delegatsiya universitetning zamonaviy laboratoriyalari va innovatsiyaga yoʻnaltirilgan loyihalari bilan yaqindan tanishdi. Shuningdek, universitetning neft va gaz sanoati uchun yuqori texnologik yechimlar, ekologik toza texnologiyalar va ilgʻor materiallar boʻyicha amalga oshirayotgan ishlariga alohida eʼtibor qaratildi.

Tashrif doirasida Toshkent shahridagi I.M. Gubkin nomidagi Rossiya davlat neft va gaz universiteti filiali faoliyati ham muhokama qilindi. Mazkur filial neft va gaz sohasi uchun yuqori malakali kadrlarni tayyorlash bilan bir qatorda taʼlimning zamonaviy talablarga mosligini taʼminlashda muhim oʻrin tutadi.

Tomonlar filialda kadrlar tayyorlash tizimini yanada takomillashtirish, oʻquv dasturlarini xalqaro standartlarga moslashtirish hamda amaliyotga yoʻnaltirilgan taʼlimni kengaytirish yuzasidan kelishuvlarga erishdilar.

Bizni kuzating

Facebook | Instagram | YouTube | Telegram