Депутат сўров юборди: 50 йиллик эски бино беморлар саломатлигига хавф солмоқда

📍 Чирчиқ шаҳридаги Тери-таносил касалликлари бўлими жойлашган бино 1974 йилдан бери фойдаланиб келинмоқда ва бугунги кунда капитал таъмирга муҳтож. Шифокорлар ишлайдиган хоналар, лабораториялар, коридор ва зиналар яроқсиз ҳолатга келган. Бинонинг том қисми, сув, иситиш ва канализация тизимлари эскирган, замонавий тиббий асбоб-ускуналар етишмайди.

➕ Ҳар йили ушбу муассаса 90 минг нафарга яқин беморга хизмат кўрсатиб, 600 дан ортиқ касаллик ташхисини аниқлайди. 2020-йилдан 2024 йилгача беморларнинг мурожаатлари сони 50 мингдан 54 минггача ошгани ҳолда, даволаш шароитлари ёмонлашиб бормоқда. Шунингдек, 100 мингдан ортиқ фуқарога тери ва таносил касалликлари бўйича таҳлиллар ўтказилади.

🏢 Олий Мажлис Қонунчилик палатаси депутати Наримон Умаров мазкур муаммоларни ҳал этиш учун бир қатор чоралар кўришни таклиф қилмоқда. Депутат ўз сўровида бўлим жойлашган тўрт қаватли бинони реконструкция қилиш, лабораторияларни замонавий ускуналар билан таъминлаш ва ҳудудни ободонлаштириш бўйича таклифлар берган. Мавжуд камчиликлар юзасидан эса Соғлиқни сақлаш вазирлигидан 10 кун ичида тушунтириш беришни ҳам сўралган.

✅ Депутатнинг ушбу сўрови Чирчиқ шаҳридаги тиббиёт муассасалари аҳволига эътибор қаратиш ва уларни модернизация қилишга туртки берувчи муҳим ташаббусдир. ССВ ўз эътиборини қаратса минглаб беморларга сифатли тиббий хизмат кўрсатиш имконияти ошади.