Paymonam to'lgani qachonlar edi?!
Toshmadi.
Ko'zimning ustidan kuldim...
Men seni izladim ilinjlar terib,
Hech qachon sen yurmas yo'llardan yurdim...

Hayqira olmadim, tog'larni tirnab,
Paymonam to'lgani qachonlar edi?!
Qovjirar kunlarim, tunlarim titrar,
Nega o'lgim kelar?!
Qachondan beri?!

O'limdan qo'rqmayman
Qo'rqmayman endi.
Sen yasha,
Lek meni kechirmay butkul!
Paymonang to'lgani qachonlar edi,
Kechirsang, unutib qo'yishing mumkin...

Boshimdan bosh olib ketmasdi quyosh,
Turtmasdi eng mayin sabolar seni,
Biz kimdan so'rabmiz bu qadar bardosh...

Paymona to'lganing qachonlar edi...

Ahadjon Ismoilov