Яна сизга келди ҳавасим,
Яна соғинч қилди тантана.
Мен турибман (рўё эмасми?!)
Эшигингиз олдида, мана.

Очсангизчи?!
(Уйда ҳеч ким йўқ!)
Хиралашар кўнглим ранглари.
Эшитяпман қулоқ тутиб жим,
Сукунатнинг жарангларини.

Ичкарида...
(Гумон тошлари
Юрагимдан отилди бир-бир...)
Юзларимга ёға бошлади,
Манзилини унутган ёмғир.

Кетсаммикан... (Бу йўллар узун)
Эзилади бешинчи қават.
Тўрт томонда кезинар маҳзун,
Севги...
Севги...
Севги...
Ва Ҳасрат.

Бирдан эшик очилди! (Тангрим
Бунчалар ҳам караминг кенгдир!!!)
Сиз қаршимда турибсиз кулиб,
(Бу қувончлар фақат меники!)

... Сизга яна келди ҳавасим,
Яна соғинч қилди тантана.
Мен турибман (бу аслида туш)
Эшигингиз олдида, мана...

Башорат Отажонова

https://t.me/dilgamaktublar