#nazm

Sevdim seni, orzularim falak bo‘ldi,
Boshdan toki oyoqqacha yurak bo‘ldi.
Kimga dunyo, kimga dunyo moli kerak,
Menga esa bir tasodif kerak bo‘ldi.

Oy qizlarga oydan ham oq baxt so‘radim,
Ayriliqdan ancha yiroq baxt so‘radim.
Ikkimizning izmimizdan chiqdi hayot,
Ikkimizga boshqacharoq baxt so‘radim.

Qo‘rqma axir, yuzimizga dog‘ tushmadi,
Boshimizga yo osmon, yo tog‘ tushmadi.
Hayronamiz hayrati ko‘p dunyosida,
Shuncha g‘amdan sochimizga oq tushmadi.

©Jo'rabek Ramazon

@daydibadar