***
Боғларда ловуллаб гуллади хазон,
Майсалар қайтадан ниш урмоққа шай.
Ёмғирлар осмонга кетмоқда қайтиб,
Сенинг келишингни сезаётгандай.

Ёлғизлик шовқини тутди оламни,
Бўғзимда кучини йўқотди оғу.
Сездим, юрагингда гуллади шу дам
Муҳаббатдан устун, бошқа бир туйғу.

Ғира-шира хона, эшик ғичирлар,
Ғуборлар ҳар лаҳза аримоққа шай?
Сенинг нафасингни сезяпман балким,
Худди ҳозир кириб келадигандай...

Ва тўфон бошланар узун йўлакда,
Ҳар битта изингдан ўт олар замин.
Жонлана бошлайсан кўз ўнгимда ва –
Тиз чўкиб қўлингдан ўпаётган мен.

Боғларда ловуллаб гуллайди хазон,
Фасллар айланар бетартиб, бесар.
Қара, сенсиз қандай саргардон дунё,
Кел, ахир, дунёни аслига қайтар...

©️Дадахон Муҳаммадиев

@dadaxonmuhammadiy