Siyosatning makdonaldlashuvi demokratiya va modernizatsiya tushunchasini ham o'z komiga tortadi. Xalq tushunchasi qadrsizlandi, istagan hamma din yo milliy qadriyatlar ortiga berkinib propaganda qilaveradi, kap-katta odamlar televizorga chiqib er yo xotin izlashga uyalmaydi. Qisqasi, muqaddaslik tushunchasi ham diniy ham dunyoviy kontekstda yo'qqa chiqadi. Bu xuddi nonni muqaddas deb axlat qutisiga tashlamaslik, ammo lavashni bemalol chiqitga chiqaraverishdek gap. Bugun mana shu 'non' qadridagi tushunchalar qulayotganiga guvoh bo'lyapmiz. Men bundan, ochig'i nolimayman. Chunki, bu o'ta tabiiy hol. Masalan, Weber aytganidek, industrial inqilob davrida albatta 'sehrdan ajralish' ya'ni disenchantment ro'y beradi. Ammo, har qanday yangilikning belini sindiradigan xalqimiz doimgidek makdonaldlashuvni hamma hamma narsaga tatbiq qila boshladi. Shundog'am ichidan chirib yotgan davlat idoralari birdan quladi yo qulayapti. Neo-liberal, davlatning mavjudiyatini rad qiluvchi ammo davlatsiz ham o'z yo'lini topa olmaydigan, ichi bo'sh g'oyalarga muqaddaslik bag'ishlab, ularni inson hayotidan ham ustun tutadigan radikal harakatlar bugun ko'chalarni to'ldirib yotibdi.
Kapitalistik ahloq haqida balki chuqurroq o'ylab ko'rish kerakdir...

Mirzohid
@bobil_kutubxonasi