Abul Yusuf | blog

O‘chirg‘ich kabi bo‘ling

Ruchka xato qiladi ammo qalam emas, chunki qalamning xatolarini o'chiradigan "o'chirg'ich" nomli do'sti bor!

Faqat haqiqiy do'stlargina sizning xatolaringizni o'chirib, yaxshi inson bo'lishingizga yordam beradi.

@abulyusufblog

DeepSeek qanday qilib AQSH tizimlaridan oʻzib ketdi?

Telegram asoschisi Pavel Durov aytishiga koʻra bu shunchaki tasodif emas:

▪️Xitoy algoritmlarining samaradorligi oʻz-oʻzidan paydo boʻlgani yoʻq. Xalqaro matematika va dasturlash olimpiadalarida xitoylik talabalar ancha vaqtdan beri boshqalardan oldinda boʻlib kelmoqda;

▪️ Sabab — Xitoyning oʻrta taʼlim tizimi. U talabalar oʻrtasida kuchli raqobatni olqishlaydi, bu samarali tamoyil sovet taʼlim modelidan olingan.

▪️ Gʻarb maktablarida raqobatdan ataylab voz kechishdi. U yerda oʻquvchilarning baholari va reytingini eʼlon qilish taqiqlangan.

▪️ Natijasi qanday boʻlganidan qatʼi nazar, barcha oʻquvchilarga “sizlar chempion” deyish birinchi qarashda yaxshi narsadek tuyulishi mumkin, ammo oʻqish tugatgandan keyin bu illyuziya haqiqat bilan juda tez parchalanadi.

@abulyusufblog

#Taqriz 📚 2025-yil 1-kitob

"Alvido, Vatan"-Aʼzam Xoshimiy

Turkiston ulamolari hijrat qilmaslikka, xalqni tashlab ketmaslikka va oxirgi tomchi qoni qolguncha ular bilan birga boʻlishga qaror qilganlar

Avtobiografik (muallif o‘z hayotini hikoya qiladi) uslubda yozilgan bu kitobni har bir o‘zbek albatta o‘qishi kerak. Negaki, muallif Fargʻona, Qoʻqon, Samarqand, Qarshi va Buxoro kabi shaharlarga safar qilib, sovet bosqinchilari davridagi xalqimizning mashaqqatli va qonli hayotini batafsil yoritib bergan.

Ushbu kitob rus bosqinchilarining SSSR atalmish daxriy davlatlari o‘zbek musulmonlari hayotiga o‘zlarining jirkanch "ma'daniyat" va odatlarini qanday olib kirmoqchi bo‘lganligi, bu yo‘lda xalqimizga qilgan zulm-adolatsizliklarini o‘sha davrning chin o‘zbeklari nigohida ko‘rib, baho berish imkonini beradi.

O‘qish davomida "Bosmachilar" deb ayblangan, aslida esa xalqining ozodligi va erkinligi yo‘lida ahdlariga sodiq qolib, dushmanga qarshi sabot bilan kurashgan va jonini fido qilgan mujohid vatandoshlarning jasoratga to‘la hayotiy hikoyalariga guvoh bo‘lasiz.

Umuman olganda, bu asar - haqiqiy o‘zbek musulmonlari tarixini ko‘rsatib, yurtni bosib olgan zolimlarning asl yuzini ochib bergan noyob kitoblardan biridir.

Alloh muallif va tarjimondan rozi bo‘lsin.

©️Abul Yusuf

@abulyusufblog

"Hozirgidan 2-3x ko‘proq topsam yetadi"- deymiz

"Shunda men ham pul yig‘aman"- deymiz

Daromad ko‘paysa, yig‘ish ko‘paymaydi. Xarajat ko‘payadi!

Avval eʼtibor berilmagan matohlar "muhim" bo‘lib qoladi.

"Men ham "odamlardek" yashashim kerak" - degan ichki ovoz keladi

"Pul yig‘a olish moliya emas, psixologiya" - Housel

Xohishlarini boshqara olganlargina pullarini boshqara oladi.

@abulyusufblog

Ertalab qahva ichish foydalimi?

So‘nggi yillarda qahva ichish va salomatlik o‘rtasidagi bog‘liqlik haqida ko‘plab tadqiqotlar olib borilmoqda. Yaqinda European Heart Journal AQShdagi 40 000 dan ortiq odam ishtirokida o‘tkazilgan 19 yillik tadqiqot natijalari e'lon qilindi. Tadqiqotda qahva ichishning vaqti va bu odatning o‘lim xavfiga ta'siri o‘rganilgan.

🔎Tadqiqot natijalari quyidagilarni ko'rsatdi:

Ertalab qahva ichish: Faqat ertalab qahva ichganlarda (ishtirokchilarning 36%) yurak-qon tomir kasalliklari va boshqa sabablardan kelib chiqadigan o‘lim xavfi ancha kamaygan. Yurak-qon tomir xavfi 31% ga, umumiy o‘lim xavfi esa 16% ga pasaygan.

Kun davomida qahva ichish: Kun davomida (ertalab, tushdan keyin va kechqurun) qahva ichganlar (ishtirokchilarning 16%) bilan qahva ichmaydiganlar o'rtasida o'lim xavfi bo'yicha sezilarli farq aniqlanmagan.

Buning sabablari nima?

Sirkadiyal ritmlar: Kechki paytlarida qahva ichish organizmning biologik soatiga salbiy ta’sir ko‘rsatib, uyquni buzadi va yurak salomatligiga zarar yetkazishi mumkin.

Uyqu sifati: Uyqu sifati pastlashsa, yallig‘lanish, qon bosimi va stress gormoni kabi omillar kuchayadi. Bu esa yurak-qon tomir kasalliklari xavfini oshiradi.

📌Xulosa:
Ertalab qahva ichish salomatlik uchun foydali, ayniqsa yurak-qon tomir salomatligi va energiya balansini saqlashda. Ammo kun davomida yoki kechqurun qahva ichish bunday foydalarni bermasligi, hatto zarar yetkazishi mumkin. Shu sababli, qahva ichish vaqtiga e'tibor berish tavsiya etiladi.

P/S: Ishni achchiq qora kofe ichmasdan boshlamayman.

@abulyusufblog

#Iqtibos

G'arb biz o'ylaganchalik daho emas. Biz ham unchalik ahmoq emasmiz. Faqatgina g'arb muvaffaqiyatsiz kishini toki u zafar qozonmagunicha qo'llab-quvvatlaydi. Biz esa muvaffaqiyatga erishgan odam toki qo'lga kiritganlarini boy bermagunicha u bilan kurashamiz.

📚"Qalblardan so'rang" kitobidan


@abulyusufblog

#Tavsiya

Misvok

Islom - poklik, ozodalik dinidir. Islom dinida ayniqsa og‘iz va tishlarni maxsus tish tozalash vositasi - arok daraxtidan yasalgan misvok bilan tozalashga alohida eʼtibor berilgan. Hatto G‘arb olimlarining eʼtiroficha, insoniyat tarixida kishilarni og‘iz va tishlarini tozalab yurishga birinchi bo‘lib daʼvat qilgan kishi Muhammad sollallohu alayhi vasallamdirlar.

Nabiy sollallohu alayhi vasallam shunday marhamat qildilar: "Misvok (tish tozalagich) bizga tozalik, Parvardigorga rozilik, ko‘zga esa ravshanlik baxsh etadi".

(Tabaroniy, "Al-Avsat")

Arok daraxti shoxchalaridan tayyorlanadigan misvokning foydalari, shifobaxsh xossalarini qadimda yaxshi bilishgan. Hofiz Ibn Hajar roziyallohu anhu hamda Ibn Qayyum misvokning oʻttizdan ortiq foyda va xususiyatlarini sanab oʻtishgan. Quyida shulardan ayrimlarini keltiramiz:

1. Misvok Paygʻambarimiz sollallohu alayhi vasallamning aslo tark etmagan sunnatlari.
2. Allohning roziligiga erishtiradi.
3. Ogʻizdagi badboʻylarni xushboʻylashtiradi.
4. Tishlarning chirishi va darz ketishining oldini oladi.
5. Milklarni mustahkamlab, qonashi va yiringlashini yoʻqotadi.
6. Ogʻiz suvini yumshatadi, balgʻamni koʻchiradi, ovozni tiniqlashtiradi, nutq talaffuzini yengillashtiradi.
7. Oshqozon faoliyatini yaxshilab, ovqat hazmiga yordam beradi.
8. Yurak, meʼda, ko‘z asablarini mustahkamlaydi.
9. Koʻzni ravshan, nazarni oʻtkir qiladi, koʻz og‘rishini toʻxtatadi.
10. Uyquni koʻchirib, yuzni goʻzallashtiradi, keksalikni kechiktiradi.
11. Oʻlimdan boshqa koʻplab xastaliklarga davo boʻladi.
12. Farishtalarni mamnun - xursand, shaytonini xafa qiladi.
13. Hasanotlarni koʻpaytiradi.
14. Xotirani kuchaytirib, zakovatni orttiradi, zehnni ochadi.
15. Shahodat kalimasini eslattiradi, yodga tushiradi.
16. Jon berishni osonlashtiradi.
17. Iymon bilan ketishga sabab boʻladi.

Zamonaviy tibbiyot ilmi xulosasiga ko‘ra, misvokning quyidagi foydalari bugunga kelib aniqlandi:

1. Tarkibida ftor moddasi bo‘lgan misvok tishlar yemirilishining (kariesning) oldini oladi.
2. Misvok xlor moddasiga ega bo‘lgani uchun tishlardagi turli rang, kir, dog‘larni ketkazadi.
3. Uning tarkibidagi silikat moddasi tishlarni yaxshigina oqartiradi.
4. Misvokdagi fosfor moddasi tishni chirituvchi bakteriyalardan himoyalaydi.
5. Trimetilamin va darmondorilar milklarni yorilishdan asraydi, jarohatlarni tuzatadi va tishlarning sogʻlomligini taʼminlaydi.
6. Eng asosiysi, tamaki va nos chekishni tashlovchilarga yaxshi yordam beradi.

Misvok ishlatishning afzal vaqtlari:

- Tahorat vaqtida.
- Namozdan oldin.
- Qurʼon qiroatidan avval.
- Ovqatdan keyin yoki taom qoldigʻi sababli ogʻiz hidi oʻzgarganda.
- Uzoq sukut yoki koʻp gapirgandan soʻng.
- Uyquga yotishdan oldin.
- Uyqudan uygʻongan mahal.
- Biror manzilga kirish yoki ahliga yoʻliqishdan avval.
- Oʻlim talvasasi va Parvardigorning huzuriga rihlat qilayotgan mahalda.

📚Manba: "Mo‘minning meʼroji - mufassal namoz kitobi"
(Shayx Muhammad Sodiq Muhammad Yusuf)

@abulyusufblog

#Iqtibos

1927-yildan keyin bu qotillik va xunrezliklar musulmonlarga nisbatan dushmanchilik tarzida yanada avjiga chiqdi. Kommunistlar Islomga qarshi boʻhtonlar uyushtirishar, Qurʼon, Hadis, din va din peshvolarini masxaralab suratlar chizishar, bu suratlarni yoʻl boʻyiga, masjid devorlariga yopishtirishar edi. Nabiy sollallohu alayhi va sallamning nomi muboraklariga loy chaplashar, teatr va kinolarda masxaromuz dramalar ijro etishar edi. Bu tahqirlardan yuz oʻgirish, nazarni saqlash “jinoyat” hisoblanardi. Kommunistlarning zulmu sitami va haqoratlari shu darajaga yetdiki, ular Paygʻambar alayhissalomning faraziy haykallarini yasab, chorrahalarga oʻrnatib qoʻyar va oʻtgan-ketgan yoʻlovchilarni
ushlashib, majburan unga qaratishar edi.
Bunday zulmlar musulmon holatida umr kechirishni xohlovchi insonlar uchun hijratdan boshqa chora qoldirmas edi.

📚"Alvido, Vatan (Samarqandu Buxoroning qonli kechmishlari)" kitobidan

@abulyusufblog

Alloh insonlarda bitta katta amalni emas, balki har kunlik kichik, lekin davomli bo‘lgan amallarni yaxshi ko‘radi. Shuning uchun bu dunyoda "Hoji aka"larning obro‘si katta bo‘lsa ham, oxiratda so‘rov namozdan boshlanadi.

@abulyusufblog

#Tavsiya

Odamlar ucha olar...

Hayotda maʼsuliyatni bo‘yniga olishdan qochadigan erkaklar bor. Men ularga o‘xshamaslik uchun ham harakat qilaman

"Ijtimoiy himoya milliy agentligi" loyihasi asosida suratga olingan "Inson" filmini ko‘rdim. To‘g‘risi juda taʼsirlandim. Film Lazizbek Sharofiddinov va Muhammadaziz Yakubov haqida hikoya qiladi. Qahramonlar inson hayotdagi qiyinchilik va to‘siqlarni qanday yenga olishi va insonning nimalarga qodirligini ko‘rsatib berishgan.

Imkoniyati cheklanganiga qaramay Laziz aka "Erkak kishi hamma narsaga o‘zi erishishi kerak!" deydi. U kishining beg‘uborligi, yashashga bo‘lgan intilishi va jasorati meni juda hayron qoldirdi.

Men Laziz akani nogiron demayman, chunki jasadi kasal bo‘lsa ham, qalbi sog‘lom, pokiza inson ekanlar. Afsuski ulardagi samimiylik, halollik, teran fikrlar baʼzi sog‘lom insonlarda ham topilmaydi. Inson jasoratining tirik naʼmunasi desa bo‘ladi.

13 yoshida hattoki o‘zidan kattalar ham erisholmagan muvaffaqiyat sohibi bo‘lgan Muhammadaziz esa alohida bir olam. Yosh bola bo‘lsa ham fikrlashi katta insonlarnikidek, "Oilam maʼsuliyatini o‘z bo‘ynimga olaman" deyishi uning maʼnaviy jihatdan qanchalar ulg‘ayganini bildiradi.

Aslida bu filmni ko‘rishimga sababchi ham Muhammadaziz, u bilan tanishganimda va suhbatlashganimda fikr-mulohazalariga hayron qolgandim. U haqidagi filmni ko‘rib, buning sababini angladim.

Baʼzi bolalar erta katta bo‘ladilar degan ibora aynan unga mos keladi. Muhammadaziz kichik jussadagi katta qalb sohibi.

Orzulari katta, maqsadlari aniq, o‘z yo‘lini topgan bola. Alloh niyatlariga yetkazsin.

Hayotda har birimiz o‘z yo‘limizni topishimiz va mas'uliyatni bo‘ynimizga olishimiz kerak, deb hisoblayman. Muhammadaziz va Laziz aka kabi insonlar bu yo‘lda katta ilhom manbai bo‘la oladi.


Filmni tomosha qilishingizni qattiq tavsiya qilaman.

©️Abul Yusuf

@abulyusufblog

#Post

Tanqid-kelajak mevasi

Bundan 10 -15 yil oldin eng ko‘p tanqid qilinadigan va doimiy kulguga olingan soha "o‘zbek futboli" edi. Bu mavzuda hech qanday senzura yo‘q, istalgan odam o‘zbek futbolini tanqid qilolardi. Natijada o‘zbek futboli rivojlandi.

Mana bugun esa Abduqodir Husanovning qaysi klubga o‘tishi va transfer qiymatini nafaqat o‘zbeklar balki, butun dunyo kuzatmoqda. Husanovga "Manchester City", "Real Madrid", "PSG" kabi grand klublarning davogar bo‘lganligi o‘zbek futbolining qay darajada o‘sib borayotganini ko‘rsatadi.

Umuman har qanday sohada senzura qo‘ymay, tanqid va tahlil imkoniyati yaratilib, xalqning o‘ziga erkin qo‘yib berilsa, o‘sha soha o‘z-o‘zidan rivojlanadi.

Shu bilan birga isteʼdod, mehnat va intizomning natijasini ham Husanov misolida ko‘rish mumkin.

Statistika hammasini ko‘rsatadi:

2023 yil iyul:
Bitkoin narxi: $29K
Husanov narxi: £100K

2025 yil, yanvar:
Bitkoin narxi: $95K
Husanov narxi: £50M

Bitkoin 3,27 barobar, Husanov esa 500 barobar qimmatlagan.

Eng qimmat resurs har doyim insonning iste'dodi va bilimi bo‘lib qolaveradi. Investitsiyani bilim va iste'dodingizga kiriting.

Siz bugun nimaga vaqt va kuch sarflayapsiz? Qaysi sohada o‘z bilimingiz va qobiliyatingizni rivojlantirishni rejalashtiryapsiz? O‘zgarishni bugundan boshlang, kelajak sizga o‘z mevasini albatta beradi!

P/S: Ha aytgancha, avvaldan "City"ga muxlislik qilardim))) 😉

©️Abul Yusuf

@abulyusufblog

Yoki odamlar yozadigan ishni qilgin, yoki odamlar o'qiydigan ishni yozgin

Franklin

@abulyusufblog