Миллий адабиётимизда миллий маънавий дунёқараш ҳамда поэтик
тафаккурнинг миллат қайғуси билан нафас олишига боғлаб талқин этилган асарлар
талайгина. Чуқур фалсафий фикр, дардчил туйғулар соҳиби таниқли шоир
Икром Отамуроднинг “Сен” номли достони шу маънода нуктадон қалб даъвати ва
эҳтиёжи билан ёзилган асарлар сирасига киради.
Достонда поэтик идрокнинг ўзига хослиги, умумий оҳанги, руҳи давр
ижодкорларини мудом ўйга толдирувчи муаммолар, уларни қийнаган миллий
оғриқлар, изтиробга солган кечинмалар фонида акс эттирилади.