"Samarqand viloyati hokimining qarori.

Shahar aholisi va turistlarga qulay shart-sharoitlar yaratish, shaharning iqtisodiy imkoniyatlaridan to'laqonli foydalanish maqsadida ... xorijiy investorlarning Samarqand shahridagi Registon maydonida joylashgan obidalarni, ilovada nomlari keltirilgan boshqa obidalar bilan birga, shahardan tashqariga ko'chirish hamda bo'shatilayotgan maydonga "Registan city" ko'p qavatli turar joy majmuasi va biznes markazi qurish to'g'risidagi takliflari ma'qullansin. Qaror Samarqandshunoslar ilmiy kengashi bilan kelishilgan".

Antiutopiya deysizmi? Bo'lishi mumkin emas deysizmi?

Bugun Boburshunoslar Andijondagi Bobur o'rniga "dom" qurishni ma'qullab turgan bir paytda, ertaga, masalan, Samarqandshunoslar Registonni, Buxoroshunoslar Buxoro Arkini "yaxshi niyatlar" bilan ko'chirishga rozilik berishiga (umuman, "yaxshi niyatlar" bilan shunday takliflar chiqishiga va qarorlarga kiritilishiga) ishonmaysizmi? "O'lmagan qul" shunday kunlarni ham ko'rganda esa kulishdan boshqa choramiz qolmaydi, chunki bugunimizni ham, ertamizni ham sotib bo'lgan "beklar" uchun o'tmish muqaddas deb o'ylasangiz adashasiz.