Raqamlashgan dunyo va unutilayotgan insoniylik

Oxirgi paytlarda raqamlashgan dunyoda yashar ekanmiz, bir-birimizdan hol-ahvol so‘rash ham tobora kamayib bormoqda. Ko‘rishish o‘rniga ovozli xabarlar, yozishmalar, borish o‘rniga esa video qo‘ng‘iroqlarni afzal ko‘ryapmiz. Eng achinarlisi, buning oldini olishga imkon va vaqtimiz bo‘lsa ham, shu yo‘lni tanlayapmiz.

Vaqt o‘tishi bilan insonlar bir-birining holidan xabardor bo‘lishni onlayn faollik orqali o‘lchaydigan darajaga yetib borishidan xavotirdaman. Balki kelajakda kimnidir eslash yoki u haqidagi qayg‘uli holatlar ham uning oxirgi kirgan vaqti yoki so‘nggi onlayn faolligiga qarab baholanar?

Bu texnologiyalar bizni yaqinlashtirayotgandek tuyulsa-da, aslida odamiylikdan uzoqlashtirmayaptimikan?