Muhammadsiddiqdan o‘zi kabi top-toza SHE'R!

Bahorga oz qoldi, yana biroz kut,
Kaftimda dovuchcha,
Qo‘ynim to‘la ishq –
Olib bormoqdaman!
Barini unut,
Yodingda qolmasin qirov bosgan qish.

Shudring o‘yin tushib,
Maysalar bilan
Barmog‘ingga tegar – aylanar nurga.
Sochlaringga yashil barglarin ulab,
Daraxtlar yelkangni quchar – pajmurda.

Kechagi qiynoqdan etgaydir xalos
Derazang raxiga qo‘ngan bir juft qush,
Bugun ham chidagin!
Yangraydi bexos –
Ko‘ksingda ichikkan ozurda tovush...

Uyg‘onsang –
Qoshingda bepoyon dengiz,
Yig‘laysan to‘ldirib erk ko‘zasini.
Men yuvib tashlayman yuzingdan, ey qiz,
Yengiltak dunyoning muz bo‘sasini!

Ko‘nglimdan uchgin-u,
Kel, qo‘limdan tut,
Xazonga aylangan – tutilgan gulim!
Bahorga oz qoldi, yana biroz kut...
To‘kilsang, qushlarga to‘kil, sevgilim.

© Muhammad Siddiq