Suyanib yashaysan yolg‘iz Xudoga,
Erkalik qilasan O‘ziga yolg‘iz.
Shivirlab so‘zlaysan ertaklar unga,
Shivirlar shamollar sochlaring silab.
Bitta-bitta baxtni terib olasan
Qo‘llaring qonab.

Yig‘larkansan chiroyli bo‘lishni o‘rganasan,
chiroyli so‘zlaysan sahnalarida,
chiroyli yashaysan tushlaringda ham,
chiroyli o‘lishni eplaysan, hatto,
ammo
baxtli bo‘lishnimas.

Toshlikka ko‘nmaysan
(o‘zing bilmagan yerlarga uloqish – dahshat!)
Ammo toshga aylantiraverar
Sekin,
sekin
sekin
sehrgar hayot –
kulgularingni,
tuyg‘ularingni,
beboshliging,
g‘o‘rliging olar
Va evaziga tutar
Bir dasta xazon...

Endi suyanasan yolg‘iz Xudoga –
Yelkang og‘rib ketar bu
Baxt va baxtsizlikning og‘irligidan!

@FeruzaXayrullayeva