Forward from: O‘zbekiston Yozuvchilar uyushmasi
O‘zbekiston xalq yozuvchisi Nazir Safarov tavalludiga 120 yil to‘ldi
Yozuvchilar uyushmasida O‘zbekiston xalq yozuvchisi Nazir Safarovning 120 yillligiga bag‘ishlangan xotira kechasi bo‘lib o‘tdi.
Tadbirni uyushma raisi Sirojiddin Sayyid ochib berdi. Unda O‘zbekiston xalq yozuvchisi Muhammad Ali, Respublika “Nuroniy” jamg‘armasi boshqaruvi raisi o‘rinbosari Sharof Ubaydullayev, shoir Abdunabi Boyqo‘ziyev, “Oltin qalam" gazetasi bosh muharriri Nazira as-Salom, adibning o‘g‘li Asqar Safarov, O‘zbekistonda xizmat ko‘rsatgan jurnalist Shuhrat Jabborov va boshqalar so‘zga chiqdi.
— Nazir Safarov publitsist, ocherknavis va dramaturg sifatida yaxshi tanilgan, — dedi yozuvchi Muhammad Ali. — Adib o‘zbek dramaturgiyasining shakllanishida muhim rol o‘ynagan, uning “Tarix tilga kirdi”, “Uyg‘onish”, “Sharq tongi” kabi sahna asarlari tomoshabinlar tomonidan munosib eʼtirof etilgan.
Ikkinchi jahon urushi davrida Nazir Safarov frontning oldingi jabhalarida bo‘lib, jangchilarning qahramonligini, dushmanning yovuzligini hikoya qiluvchi “O‘q o‘tmas botir”, “Vodillik qahramon”, “Komissar Qoraboyev”, “Sevgi”, “So‘nggi nafasgacha”, “O‘zbek farzandlari”, “Qahramonning tug‘ilishi” kabi qator ocherklar yozdi. Adibning “Uzoqni ko‘zlagan ayol” qissasi shular jumlasidandir. Yozuvchining 1954-1957-yillarda yaratgan zamonaviy mavzudagi katta asarlari “Hayot maktabi”, “Elmurod” kabi pyesalaridan iboratdir.
— Yaqindagina nashrdan chiqqan "Jizzax adiblari" nomli to‘plamning birinchi jildi Nazir Safarov ijodi bilan boshlangan, — dedi uyushma raisining birinchi o‘rinbosari Minhojiddin Mirzo. — Bu ham bo‘lsa adibning hayotiy va ijodiy faoliyatini keng ommaga tanishtirishda muhim ahamiyat kasb etadi.
Adibning “Oltinoy”, “Olma olmadan uzoqqa tushmaydi”, “Ahmadali o‘z baxtini qanday topdi” hikoyalari g‘oyaviy-badiiy jihatdan puxtaligi bilan ajralab turadi. Uning “Bir tomchi qon”, “Ko‘rgan-kechirganlarim” nomli qissalari, “Navro‘z” romani 60-yillar adabiyotida sezilarli voqea bo‘lgan, deya taʼkidlandi tadbirda.
Tadbirda so‘zga chiqqanlar adibning hayot va ijod yo‘llariga nazar tashladi. Iliq xotiralar bilan yodga olishdi.
Zulayho Ahmadjonova tayyorladi.
Yozuvchilar uyushmasida O‘zbekiston xalq yozuvchisi Nazir Safarovning 120 yillligiga bag‘ishlangan xotira kechasi bo‘lib o‘tdi.
Tadbirni uyushma raisi Sirojiddin Sayyid ochib berdi. Unda O‘zbekiston xalq yozuvchisi Muhammad Ali, Respublika “Nuroniy” jamg‘armasi boshqaruvi raisi o‘rinbosari Sharof Ubaydullayev, shoir Abdunabi Boyqo‘ziyev, “Oltin qalam" gazetasi bosh muharriri Nazira as-Salom, adibning o‘g‘li Asqar Safarov, O‘zbekistonda xizmat ko‘rsatgan jurnalist Shuhrat Jabborov va boshqalar so‘zga chiqdi.
— Nazir Safarov publitsist, ocherknavis va dramaturg sifatida yaxshi tanilgan, — dedi yozuvchi Muhammad Ali. — Adib o‘zbek dramaturgiyasining shakllanishida muhim rol o‘ynagan, uning “Tarix tilga kirdi”, “Uyg‘onish”, “Sharq tongi” kabi sahna asarlari tomoshabinlar tomonidan munosib eʼtirof etilgan.
Ikkinchi jahon urushi davrida Nazir Safarov frontning oldingi jabhalarida bo‘lib, jangchilarning qahramonligini, dushmanning yovuzligini hikoya qiluvchi “O‘q o‘tmas botir”, “Vodillik qahramon”, “Komissar Qoraboyev”, “Sevgi”, “So‘nggi nafasgacha”, “O‘zbek farzandlari”, “Qahramonning tug‘ilishi” kabi qator ocherklar yozdi. Adibning “Uzoqni ko‘zlagan ayol” qissasi shular jumlasidandir. Yozuvchining 1954-1957-yillarda yaratgan zamonaviy mavzudagi katta asarlari “Hayot maktabi”, “Elmurod” kabi pyesalaridan iboratdir.
— Yaqindagina nashrdan chiqqan "Jizzax adiblari" nomli to‘plamning birinchi jildi Nazir Safarov ijodi bilan boshlangan, — dedi uyushma raisining birinchi o‘rinbosari Minhojiddin Mirzo. — Bu ham bo‘lsa adibning hayotiy va ijodiy faoliyatini keng ommaga tanishtirishda muhim ahamiyat kasb etadi.
Adibning “Oltinoy”, “Olma olmadan uzoqqa tushmaydi”, “Ahmadali o‘z baxtini qanday topdi” hikoyalari g‘oyaviy-badiiy jihatdan puxtaligi bilan ajralab turadi. Uning “Bir tomchi qon”, “Ko‘rgan-kechirganlarim” nomli qissalari, “Navro‘z” romani 60-yillar adabiyotida sezilarli voqea bo‘lgan, deya taʼkidlandi tadbirda.
Tadbirda so‘zga chiqqanlar adibning hayot va ijod yo‘llariga nazar tashladi. Iliq xotiralar bilan yodga olishdi.
Zulayho Ahmadjonova tayyorladi.