Respublika "Hunarmand" uyushmasi rasmiy sahifasi

#Ассалом_Наврўз!

Наманганда байрам шукуҳи

Бугун она Ватанимизнинг ҳар бир кўчаси, ҳар бир маҳалласида бунга яққол гувоҳ бўлиш мумкин.

Хусусан, вилоят марказидаги «Тинчлик» хиёбони ҳамда Давлатобод туманида жойлашган «Афсоналар водиси» тематик парки чинакам сайлгоҳга айланди.

Соат миллари 10:00 га яқинлашганда “Тинчлик” хиёбонига вилоят раҳбарияти, ҳуқуқни мухофаза этувчи идоралар, ташкилотлар раҳбарлари, нуронийлар, кенг жамоатчилик вакиллари жамландилар.

Хиёбонда Наманган шаҳридаги маҳаллалар, корхона-ташкилотлар жамоалари ўзига хос кўргазмалар ташкил этишган. Бир ёнда спортчию, ҳунармандлар, яна бир томонда санъаткорлар барчага байрам кайфиятини улашмоқда.

Махсус безатилган саҳнада маданият соҳаси вакиллари эл хизматида. Шу ерда сайлнинг тантанали очилиш маросими бўлиб ўтди.

Наманган вилояти ҳокими, Ўзбекистон Республикаси Олий Мажлиси Сенати аъзоси Шавкатжон Абдураззоқов вилоят аҳлини байрам билан табриклади.

Вилоят раҳбари «Қадриятларинг боқий бўлсин, Наврўз!» деган бош ғоя асосида нишонланаётган байрам мазмун-моҳияти, шунингдек, «Атроф-муҳитни асраш ва «Яшил иқтисодиёт» йили»да вилоятни ҳар томонлама ривожлантириш бўйича режалаштирилган ишлар ҳақида батафсил тўхталди.

Байрам арафасида вилоятимиздан 15 нафар шижоатли, фаол, ташаббускор маҳалла тизими вакиллари “Маҳалла ифтихори” кўкрак нишони билан тақдирлангани эътироф этилиб, мукофотлар эгаларига тантанали равишда топширилди.

Шундан сўнг сайл бошланди.

Таъкидлаш жоиз, байрам муносабати билан шаҳардаги кам таъминланган, эҳтиёжманд оилаларнинг 10 нафар фарзандига хатна тўйи ўтказилди. Тўйболаларга ва уларнинг оиласига совғалар берилди. Шунингдек, 10 та қозонда сумалак тайёрланиб, иштирокчиларга тарқатилди. Қолаверса, Наврўзга атаб тайёрланган 20 метрлик варрак, 25 килограммлик патир нон намойиши барчада катта қизиқиш уйғотди.

Айни вақтда Давлатобод туманидаги “Афсоналар водийси” тематик паркида ҳам сайл бўлиб ўтмоқда.

Наманган вилояти ҳокимлиги Ахборот хизмати.

Sayt | Telegram | Instagram | Facebook |Twitter | YouTube