Insonga nima uchun qadriyatlar kerak?
Yaqinda birinchi bosqich kollej o’quvchilari bilan dars jarayonida ularni fikrlashga undash va ularda qadriyat tushunchalarini singdirish maqsadida ulardan so’rovnoma oldim. So’rovnomaning mazmuni shundaki ularga insonlarda ular qadrlaydigan uchtadan yoqimli va ular nafratlanadigan hislat, fazilatlar haqida edi.
Javoblar yomon emas sababi har bir javobni ular bilan o’zaro muhokama qildik hamma ham bir xil fikrlamaganidek ba’zi javoblar juda sayoz va biroz saviya tomonlama oqsash bor edi.
Endi men bugun qadriyatlar umuman shaxsiy prinsiplar insonga qanchalik kerak mavzusida ikki og’iz yozsam.
Qadriyat - bu insonning ichki qonun qoidalari. Ular hayotiy qarorlar qabul qilishda va jamiyatda muvaffaqiyatga erishishda yo‘l-yo‘riq ko’rsatib turadi.
Masalan, qadriyatlar har bir insonning hayotda nimani muhim deb bilishini va o‘zi uchun qanday qonun qoidalarni belgilashini ko‘rsatadi.
Agar siz adolatni qadrlasangiz, biror joyda kimnidir haqsiz ayblashsa, bunga qarshi chiqasiz, chunki bu sizning ichki mezonlaringizga zid keladi.
Agar qaysidir holatda qiyin qarorlar qabul qilishingiz kerak bo‘lsa, qadriyatlaringiz sizga qaysi yo‘ldan borishni ko‘rsatadi. Halollikni qadrsangiz, to‘g‘ri yo‘lni tanlaysiz, hatto bu yo‘l qiyin bo‘lsa ham.
Xulosa o’rnida:O‘zingizni bir katta daraxt deb tasavvur qilsangiz. Bu daraxtning ildizlari —
qadriyatlar. Ildizlar daraxtning yashashini va mustahkam bo‘lishini ta’minlaydi. Agar daraxtning qadriyatlari kuchli va mustahkam bo‘lsa, daraxt o‘sib rivojlanadi. Agar qadriyatlar bo‘lmasa, daraxt zaiflashib qoladi. Bu hayotda ham shunday — qadriyatlaringiz qanchalik mustahkam bo‘lsa, siz shuncha kuchli bo‘lasiz shu bilan birgalikda shunchalik qatiyatli bo'la olasiz.
💬 MustofaBlog