#olis_yaqin_ovozlar

* * *
Menda hech vaqo yo‘q so‘zimdan boshqa,
Valekin boshim tik, yashayman mag‘rur.
Borliq dengizlari to‘lsa ham yoshga,
Yozaman ko‘klarni quchganin g‘urur.

Menda hech vaqo yo‘q so‘zimdan boshqa,
Ko‘zguda aks etgan bir jasad, xolos.
Vujudni berkitib turgan matolar
Menlikni qullikdan qilolmas xalos.

Menda hech vaqo yo‘q so‘zimdan boshqa,
Oq qog‘oz – sirdoshim,
Qalam – bardoshim.
Orzular yiroqlab ketgani qachon?
Bulutni quchmoq-chun yer o‘par boshim.

Menda hech vaqo yo‘q so‘zimdan boshqa,
Ko‘ngilni ranjitib, shod etar ham u.
Mening yuragimda berkingan dunyo
So‘zimning boshida boshpana mangu.

©Hulkaroy SHERZOD