ЭРТАГА МЕНИ ҲАМ УЙҒОТ БОМДОДДА

Эртага мени ҳам уйғот бомдодда,
Насибам ёлвориб ўзингдан сўрай.
Йироқдан ҳаққимга дуо қилганни,
Қўл очиб дуойим нурига ўрай.

Эртага мени ҳам уйғот бомдодда,
Пойингга бош қўйиб, тўкай дардимни.
Сийратим иймондан айлаб чароғон,
Севгингга тўлдиргин кўнгил қасримни.

Ғафлатда қолмасин ғанимат дамим,
Шифобахш каломинг айтайин  ёддан.
Ризойинг олмоқчун ўчмасдан шамим,
Худойим, мени ҳам уйғот бомдодда.

Руҳини шод этай тиловат этиб,
Қатордан кам бўлган азизларимни.
Табибим, омон қил  дийдори ширин,
Юраги гул каби нафисларимни.

Эртага бомдодда мени ҳам  уйғот,
Мусофир қулингга кўрсатиб карам
Муборак тонгингдек поклансин ҳаёт,
Пойингда тупроқлик қилайин Эгам!

Эртага мени ҳам уйғот бомдодда...

          
Хайрли Тун Азизларим