bu yogʻiga ikkalamiz qoldik. oldimizda bir yoʻl bor. hamrohim esa faqat sensan. u manzillarda nima kutib turgani menga qorongʻu. balki, yorugʻlik. ehtimol, zulmat. farqi yoʻq. zarracha bundan tashvish chekmayapman.

oʻylantirayotgani: sen va farzandlarimiz oldidagi masʼuliyatimni toʻla-toʻkis ado eta olamanmi, sizlarni har qanday vaziyatda muhofaza qilishga kuch topamanmi, qizlarimizni oʻylaganimizdek tarbiya qilamizmi. shu kabi oʻy-xayollar menga koʻp mulohaza qilishga majbur qiladi.

bilasanmi, meni borimcha qabul qilganing kabi men ham seni aslingcha sevdim. qalbingga oshiq boʻldim. seni oʻzimga tabib deb bildim. meni davolaysan dedim. meni oʻz sofliging, gʻuborsizliging ila davolashingga ishondim, koʻngil tikdim. tavakkul qildim. va bilginki, bu qarorimdan hech qachon afuslanmayman.

seni kimgadir taqqoslashdan, kimlarnidir senga namuna qilib koʻrsatishdan tamoman xoliman. mening ayolim qachonlardir hammasini eplashiga chin dildan ishonaman. ha, sen kimlardandir kamroq kitob oʻqigandirsan, hayotiy tajribang ham oz boʻlishi mumkin. hozircha kreativ ham emasdirsan.

lekin kun kelib, albatta, hammasiga erishasan. men bundan zarracha shubha qilmayman. oʻzimda borlarini senga oʻrgataman, baʼzi ilmlarni birgalikda oʻrganamiz, yangiliklar yaratamiz, oʻzimizning oʻzgacha olamimizni oʻz qoʻllarimiz ila rango-rang qilamiz. va sendan koʻp narsalarni oʻrganaman!

men — xazonrezlar orasida koʻmilib yotgan xazinaman. sen meni top. sayqal ber. meni toʻldir. maʼnan toʻldir.

#BX

@zuhurot