Опамга хат

Опа, ёдингдами, узун кечалар,
Чироқ теграсида дарс қилар эдик.
Печнинг орқасида, ой ёруғида
Бувим макка донин уқалар эди.

Опа, ёдингдами, рўзғор - минг юмуш.
Умид қилар эдинг қуйилишимга.
Чорладинг, мен бўлса ўйинларга эш,
Беркиндим жинкўча муюлишига.

Опа, ош дамлардинг етти укангга,
Сенга байрам эди - биз тўйганимиз.
Бизга кулги эди - сен келгунингча,
Бир қошиқ қолдирмай еб қўйганимиз.

Оқ кўйлак кийдирсанг, олча узганим,
Лаб тишлаб эгнимга қаролмаганинг,
Шафтоли шохидан қулаганим кун,
Ҳафталаб ишингга боролмаганинг.

Қаттиққўл онадек гирён, безовта,
Кескир сўзлар эдинг шунга муносиб,
Аммо билар эдим-йиғлардинг тонгда
Онамиз суратин бағрингга босиб.

Ўжар макка дони сачрагандай тирс,
Узилиб сочилдик етти томонга.
Кўнглимизда "дунё" деган ғариб ҳис.
Ортга ҳеч боқмадик, боқдик замонга.

Опа, мен томонда ҳаммаси яхши,
Ғам етса, энг аввал топаман сени.
Ўзинг ҳам кечикмай хабар олиб тур,
Осонликча катта қилдингми мени...

Опа, салом билан беш яшар синглинг.

Маъмура Зоҳидова

@mamurazohid