Tilga oid faktlarga qiziqaman. Suratdagi pishiriqni koʻpchilik "Daniya pishiriqlari" (Danish pastry) sifatida taniydi. Qatlama xamir oʻrtasiga pishloq, murabbo, marsipan, shokolad, mayiz va hokazo solib pishirishadi.

Qiziq tomoni shu pishiriqni Daniyada "Vena noni" (wienerbröd) deb atashadi. Venada esa u "Kopenhagener" (kopengagenlik) deb ataladi😃

Tarixini oʻqisam, aslida kelib chiqishi noaniq boʻlgani uchun nomlanishida chalkashlik bor ekan. 1850-yillarda Kopengagenda novvoylar ish tashlashadi. Novvoyxona egalari xorijdan novvoy chaqirishga majbur boʻladi. Shunda avstriyalik novvoylar Daniyaga borib ishlay boshlaydi va oʻzi bilan birga tuxumli, qatlama xamir qorish anʼanalarini ham olib boradi.

Oʻsha davrda Kopengagenda "Vena novvoyxonalari" ham ochiladi va suratdagi pishiriqni oʻsha novvoyxonadan olgan daniyaliklar uni "Vena noni" deb atay boshlaydi. Daniyada ishlab qaytgan novvoylar Venada ham shu pishiriqni pishira boshlaydi va odamlar uni "kopenhagener", yaʼni, Kopengagendan kelgan deb nomlaydi.