Bugun Surxondaryo viloyati hokimi Ulug‘bek Qosimov temir yo‘l atrofida joylashgan aholi yashash punktlari, mahalla va qishloqlar, yo‘lbo‘yi hududlar va ko‘chalarda olib borilayotgan obodonlashtirish ishlari bilan tanishish maqsadida Termiz temir yo‘l vokzalidan poyezdda mas’ullar bilan yo‘lga chiqdi.

O‘rganish jarayonida Termiz shahri, Termiz, Jarqo‘rg‘on, Qumqo‘rg‘on, Sho‘rchi, Denov, Sariosiyo, Uzun tumanlari hududidan o‘tuvchi temir yo‘l yoqasidagi mahallalar qiyofasiga, ko‘chalar, korxona va tashkilotlar binolari holatiga e’tibor qaratildi.

Mutasaddilarga yo‘nalish bo‘ylab mahallalarning ozodaligini ta’minlash, aholining tomorqadan samarali foydalanishi uchun sharoit yaratish, shuningdek, tashkilot va muassasalarning o‘z hududining tozaligini saqlash mas’uliyatini oshirish topshirig‘i berildi.

Shundan so‘ng, viloyat rahbari Uzun tumani Madaniyat markazi binosida mahallalarda "mahalla bankiri" hamda "mahalla agenti" faoliyatini samarali tashkil etish yuzasidan o‘tkazilgan seminarda ishtirok etdi. Unda Prezidentimiz qarori bilan yangi tizimga yuklangan vazifalar yuzasidan batafsil tushuntirishlar berildi hamda mutasaddilarga "mahalla bankiri" va "mahalla agenti" faoliyatini yo‘lga qo‘yish topshirig‘i yuklandi.

Surxondaryo.uz | Telegram | Facebook | Instagram | YouTube | X