Ahmedov |Mentality|

Ba'zi narsalar uzoqdan qaraganda o'ziga xos go'zal ko'rinadi.

Oy ham 300 ming kilometr masofadan maftunkor, ammo yaqinroq borsang, asteroidlardan qolgan izlarni ko'rasan.

Quyosh ham 150 million kilometr uzoqlikdan yoqimli issiqlik va yorug‘lik tarqatadi. Yaqinlashsang, nima bo‘lishini tasavvur qilish ham qo‘rqinchli.

Yulduzlarning go‘zalligini aytmaysizmi?

Agar, biror narsa bizga go‘zal koʻrinayotgan boʻlsa, demak biz uni go‘zal ko‘rinadigan darajada uzoqlikdan kuzatyapmiz.

Odamlar bilan ham xuddi shunday aslida.

@tenglam_uz

🚥

Yoʻl chetida turvolib svetoforning piyodalarga atalgan yashil chirogʻini yonishini kutyapman. Yonimda rus ayol chamasi 5-6 yoshli bolasiga svetofor qanday ishlashini tushuntiryapdi.

—Qara, agar qizil yoniq boʻlsa odamlar hali yoʻldan oʻtishi mumkinmas, degani. Biz yashil yonganda oʻtamiz, dedi.

Intizorlik bilan kutyapmiz yashil yonogʻoymadi hech. Keyin ayol yoʻlning ikki tomoniga qarab svetoforning qizil chirogʻida oʻtib ketdi. Bolasiga qarab nimadir dedi, ehtimol baʼzida yashil chiroq yonishi shart emas, degandir balki.

Ular ketdi, men esa yashil chiroq yongunicha kutdim. Gʻalati his oʻtdi.

Prinsiplar baʼzida odamlarni ahmoq qilib koʻrsatib qoʻyadi.

@tenglama_uz

—Mantiqan insonning tug'ilgan kuni takrorlanmas hodisa, bir marta bo'ladi va boshqa hech qachon qaytib kelmaydi. Boshqa kunlar orqali shunchaki necha yil o'lmay yashaganimizni bilamiz xolos. Baʼzilar tugʻilgan kunini unutilmas muhim kun sifatida ilohiylashtirib yuboradi. Yana oʻylaganim shuki koʻpchilik yil mobaynida yaqin odamlaridan olmagan eʼtiborni shu kun orqali toʻldirishni xohlaydi. Eng yomoni meni tugʻilgan kunimda tabriklamading, deydigan odamlar ensamni qotirgani. Bundanda battarini aytaymi, tugʻilgan kunni nishonlash majburiyatga aylanib boryotgani va tugʻilgan kuni yaqinlashayotganidan stressga tushayotgan odamlarning koʻpayib borayotgani. Gap nishonlash yoki nishonlamaslikda emas, ortiqcha dramitizatsiya haqida.

@tenglama_uz

Baraka emas...

Baraka — bu ko'p narsaning "kamlik qilishi" emas. Kamlikning ko'plik qilishi.

Baraka — bu ovqatga to'yish va sarflanmagan energiyani qorinning tagiga yog' bo'lib o'tishi emas.

Baraka — bu vaqtning ortib ketishi emas, balki oz vaqtda ko‘p ish qilishdir.

Baraka — bu muommoying ko'pligida ham halovat borligi.

Hammasiga ega bo‘lish emas, ega bo‘lgan narsaning qadrini bilish.

Baraka bu do'stlarning ko'pligi emas,kam bo'lsa ham qalbga yaqin bo'lgan samimiy insonlarning borligi.

Baraka — ko‘plikka emas, sifatga; tashqi boylikka emas, ichki halovatga erishishdir.

Pul kerak, uy kerak deymiz-u aslida uni ortidan keladigan halovatga muhtojmiz.

@tenglama_uz

Qadr

Word, Excel, PowerPoint — bular aslida pulli komputer dasturlari, biz tekinini ishlatamiz, oʻgʻirlanganini!

Biz qoʻshiqlarni tekinga eshitamiz, aslida kuychilarning haqini spotify va yandex music orqali toʻlashimiz kerak.

Biz koʻrayotgan filmlarning haqini toʻlashim kerak edi, kinoteatr, netflix orqali.

You Tubeʼda sifatli content qiladiganlar kam, nega koʻpaymayapdi, chunki biz tekiniga oʻrganganmiz.

Tekin — ijodkorlikni bugʻadi.
Tekin — rivojlanish yoʻlini yopadi.
Tekin — qadrlashni unuttiradi.

Halol mehnat ishtaha yaratadi.

Haqini ado etib foydalanish qadr.

Maylida, oʻrni kelsa yozay degandim.

@tenglama_uz

Taqdir: Sabab va Oqibat Zanjiri

Mashinaning eshigini do'stim qattiq yopdi, natijada eshik barmog'imni qisib qoldi.

Bu vaqtda miyam aybdorni oson topdi, albatta o'zim aybdor.

Men: no-no-no-no, shoshma.

Balki do'stim aybdordir, e'tiborsizlik qildi u.

Balki mashinaning egasi aybdordir, biznikiga kelgani uchun. Yo'oo'q.

Ehtimol ayam aybdordir, axir shafyorni u chaqirgandi uyimizga.

Ehtimol mol aybdordir, uning yemi tugagani uchun ayam shafyorni chaqirgandi.

Yana o'zim aybdorman, axir o'tgan bozor atayin kam olgandim molning yemini.

****************************************

Taqdirga iymon keltirgan kishini qiynamaydi, bu o'ylar.

U o'ylaydi, hammasi to'g'ri vaqtda, to'g'ri joyda sodir bo'ldi, der.

Ayb unda bo'ldi, bunda bo'ldi, der ba'zi bir qo'ylar.

Axir, bu dunyoda aybdor – yo har kim yo hech kimdir.

@tenglama_uz

Manba: Haqiqiy Oqimning Asosi

Chingizxon biror mamlakatga bostirib kirganida, o'zi haqidagi ma'lumotlarni noto'g'ri ravishda ko'rsatgan — qo'shining sonini oshirib, o'zini shafqatsiz va qonxo'r sifatida tasvirlagan. [1]

Sezar esa, muhim xatlarni shifrlangan tarzda jo'natgan, bu esa uning harakatlarini himoya qilishga yordam bergan.[2]

Bugun biz ko'pincha odamlar oqimi, pul oqimi, mahsulot oqimi kabi tushunchalar bilan uchrashamiz.

Biroq, barcha zamonlarda eng muhim oqimlardan biri bu — ma'lumotlar oqimidir.

Insoniyat mavjud bo'lgani sayin, ma'lumotlarni yaratadi, to'playdi, saralaydi va tarqatadi.

"Manba" so'zi arab tilidan olingan bo'lib, aslida daryo yoki oqimning boshlanish nuqtasini anglatadi.

Shu o'rinda, soy suvining manbasi — tog' yoki buloqdan boshlanadi, yorug'likning manbasi esa — quyosh.

Afsuski, ba'zi ma'lumotlarning manbasi yo'q, bu esa yolg'on, fitna yoki konsprologiya tarqalishiga olib keladi.

Asosiy g'oya shuki, har qanday oqimning o'z manbasi bo'lishi zarur, chunki bu manba uning ishonchliligini ta'minlaydi. Ma'lumotlar oqimi ham manba bilan bog'liq bo'lsa, u holda noto'g'ri va zararli ma'lumotlar tarqalishining oldini olish mumkin.

@tenglama_uz

Hissiy Manipulyatsiya

Jahl hissi tufayli kimnidir urasiz, so'kasiz.
Qo'rquv hissi tufayli shokka tushishingiz mumkin.

E'tibor bersangiz, ko'plab videolarning orqa fonida mashhur trenddagi musiqa bo'ladi.
Oddiy bir video ortidagi musiqa hikoyani yanada chuqurroq qiladi, uni dramatiklashtiradi.

Nega musiqa bo'ladi, bilasizmi? Sababi — hissiyotlarni qo'zg'atish uchun.

Hissiyot qo'zg'alsa nima bo'ladi? Siz yig'laysiz, siz kulasiz, siz achinasiz, siz qo'rqasiz...

Bu yomonmi?

Ha, chunki insonlarning "his qilish" qobiliyati orqali ularni istalgan yo'nalishga burish mumkin.

Odamlar biror hissiyot tufayli to'g'ri va noto'g'ri qarorlar qabul qilishadi.

Musiqa sizga yoqadimi-yo'qmi, buni hislaringiz belgilaydi.
Hislar esa sizning qarorlaringizni belgilaydi, qarorlar harakatingizni...

Har bir qadam — hissiyotlar natijasi.

Apple kompaniyasining shiori ham hislar bilan bo'g'liq. ( We don't sell products. We sell feelings.)

Demak, kim yoki nima hissiyotlaringizni boshqarsa, sizning qarorlaringiz va harakatlaringizni ham boshqara oladi.

@tenglama_uz

Soddalik va zaruratning kuchi: Uch, To'rt

Hech qachon uch kishidan ortiq bo‘lgan davraga qatnashishni istamaganman.

Chuqur va mazmunli suhbatlar ikki yoki uch kishidan ortiq bo‘lmaganda, yanada qiziqarli va samimiy bo‘ladi.

Telegramda cheksiz kanallarga obuna bo‘lishning hojati yo‘q, uchta, nari borsa, to‘rtta kanaldan etarlicha foyda olish mumkin.

Dasturxonda ham ortiqcha nozi-nem'atlar bo‘lishi shart emas, faqat eng zarur bo‘lgani bo‘lsa kifoya.

Yuzlab kitoblarni o‘qiysiz, lekin faqat ikki yoki uchta asar eng zarur va foydali bo‘ladi.

Mening tanishlarim ko‘p emas, ammo uchta samimiy do‘stim bor, ularning esa juda ko'p tanishi bor.

Ehtimol, ko‘p narsaga ega bo‘lish va ularni to‘liq qondirish istagi mukammal ko‘rinar, ammo aslida zaruratni tanlash ham o‘zining ahamiyatiga ega.

Xulosa qilib aytganda, ko‘p – har doim ham yaxshilikka olib kelmaydi, kam – har doim yetishmovchilik emas. Muhimi, keraklini tanlashdir.

Hayotning asosiy mohiyati – ko‘p narsalarga ega bo‘lishda emas, balki eng zarur va qimmatli narsalarni aniqlashda va ularga e'tibor qaratishda.

@tenglama_uz

Ahmoq Shoh Sindromi: Haykallar, PR va Qalbdagi Izlar.

Iosif Stalin, Saddam Husayn, Imperator Nero, Muammar Qaddafi, Nikolay Chaushesku.

Bu insonlar tiriklik cho’g’ida o’zlariga haykal o’rnatgan shaxslar edi.

Ahmoq shoh, o'ziga haykal o'rnatadi, degan gap bor!

Ular vafot etdi, haykallari esa xalqning nafrati va g'azabi ostida buzildi.

Nega bu haqida o'ylab qoldim, bilasizmi?

Bu holat faqat prezident, shoh yoki imperatorlar bilan sodir bo'lmaydi. Oddiy odamlar ham o'zlariga ko'rinmas haykallar o'rnatishga intiladi.

Bugungi kunda o'zi haqida kino suratga olib, jamiyat oldida kulgiga qolgan millionerlar paydo bo'ldi. [1]

Bugungi kunda o'zini ulug'lab, o'z hayoti va muvaffaqiyatlari haqida hadiksiz gapiradiganlar ko'paydi.[2]

Go'yoki ular o'zlari uchun ko'rinmas haykallar yaratyapti.

Ammo tarix shuni ko'rsatadiki, haykallar qanchalik baland va ulug'vor ko'rinmasin, ularning poydevori samimiylik va haqiqatga asoslanmagan bo'lsa, bir kun kelib qulaydi.

O’zingiz haqingizda kitob yozing, agarda adekvat yozilgan bo’lsa xalqning maqtoviga qolarsiz balki, lekin kino, haykal yaratmang, agar kerak bo’lsa xalqni o’zi siz uchun yaratadi. Inson esa o’ziga adekvat bo’lishi qiyin.

Haqiqiy iz qoldirish esa haykal bilan emas, qalblarda qoldirilgan ta'sir va amallar bilandir.

@tenglama_uz

Qarilik va Faollik

60 yoshga yetib, pensiyaga chiqib, hech ish qilmasdan, hech dardni o’ylamasdan yashashni eng oliy maqsad qilib olarkan 45 yoshdan o’tkan odamlar.

O’sha vaqt yaqinlashaversa hayot o’ylarsiz, ishlarsiz, qiyinchiliklarsiz, qanday bo’larkin, deb go’zal xayol qilarkan.

O’sha yoshga yetganda, ishlashni to’xtatadi, yotib yeyish, ichish, xullas qarilik gashtini surishni boshlaydi. Ikki yil o’tib, shifokor yo insultni yo infarktni yozib beradi.

Sabab: kam harakatsizlik, noto’gri ovqatlanish, uyqusizlik deb yoziladi.

Inson tana mushaklai yetarlicha ishlamasa qotishni boshlaydi (atrofiya).

Oyoq bor ekan, yurushi kerak, bel bor ekan, o’gir ko’tarishi kerak, qo’l bor ekan, qattiq ishlashi kerak, miya bor ekan, muammo yechishi kerak aks holda hammasi atrofiyaga uchrashni boshlaydi.

70 yoshda ham qo’shnimiz O’ral bobo soqoli bo'lsa ham ketmon chopardi.

Nega shu yoshda ishlagan ekan, desam, chunki u kishi charchashni va uxlashni xohlagan ekan…

Xulosam shuki, inson o'z faoliyatini to'xtatganida, tanasining va ruhining zaiflashishi boshlanadi, shu sababli harakatda bo'lish, o'zini har doim faol saqlash zarur. 70 yoshda ham barcha mushaklariz qimmilab tursin, omin.

@tenglama_uz

Uyqu: Zarur ehtiyoj yoki bekorchi odat?

Inson hayotining uchdan bir qismini uyquda o’tkazadi, deb vahima solyapti bir inson.

Kam uxlasang manzilga ertarog’ yetib borasan, barcha ishlaringni qilishga ulgurasan, deyapti boshqasi.

Muvaffaqiyatli insonlar erta tongda uyg’onadi, deyapti yana biri.

Uxlash go’yoki zarari mashg’ulot, bekorchilikdek talqin qilinayotgandek tuyulyapti. Menda ba’zi shaxsiy qarashlar mavjud.

Birinchidan, biz yaxshi uyqu tufayli uzoqroq yashaymiz, hayot va so’glik yaxshilanadi. Uyquda miya ma’lumotlarni qayta ishlaydi, keraksizlarini o’chiradi, immun tizimi esa mustahkamlanadi.

Ikkinchidan, kam uxlash ishlarni unumli bo’lishini ta’minlash haqida ko’p dalillar bordir lekin unumli ish sog‘liq evaziga kelayotgan bo‘lsa, buning narxi haddan ziyod yuqori. Ba'zida esa kam uxlash unumli ish uchun yetarli emas.

Uchinchidan, muvaffaqiyatli insonlar erta uyg’onar ekan, ular qanday kayfiyatda uyg’onishi va qanday halovatda uyquga ketishi faqat o’ziga ayon. Fikrimcha, ehtimol majburligidan uyqu ritmiga amal qilar?

Subyektiv xulosam esa, muvaffaqiyat erta uyg’onish, kech uxlash, kam uxlash, erta uxlashda emas balki uxlash kerak bo’lganda uxlay olish, uyg’onish kerak bo’lgan uyg’onishdir va yetarlicha uxlashdir. Uyqu hayotimizning uchdan bir qismini olsa-olar, ammo bu vaqtni foydasiz deb hisoblash kerak emas. Aksincha, u hayotimizning boshqa ikki qismi samarador bo‘lishiga asos yaratadi. Fikrimda ba'zi qarashlar bahsli bo'lsa-da yozdim.

@tenglama_uz

Tugamaydigan hikoya

Mabodo televizorni yoqsam 3 ta kanaldan birida nimadir koʻradigan boʻlganman...

1. Dunyo boʻylab
2. Sport
3. Bolajon

Nega, chunki biri maʼlumot bersa, biri
havotirga soladi..

Hozirgi kinolarni boshini koʻrib oxiri qanday tugashini payqash mumkin🤣.

•Monov yigit monov qizzi sevib qoldimi, demak kinoni oʻrtasida ular qiynaladi.

•Kinoni boshida qiz bilan yigit dushmanmi, demak oxirida ular sevishib qoladi.

•Kinoni boshida qiz kambagʻal, yigit boymi, demak yigitni ahvoli chataq, qizni sinovli kunlar kutib turibdi.

•Kinoda super qahramon bormi, demak super dushman ham boʻladi.

Hayot kino emas. Hayotda har qanday tugash - bu yangi boshlanish.

Yaxshilik bilan tugasa ham, hali davomi bor...

Yomonlik bilan tugasa ham hali davomi bor...

Hayotning o'zi bir "davom etuvchi hikoya" bo'lib, unda hech narsa yakuniy emas.

@tenglama_uz

Hamma sotuvchi

O‘qituvchi bilim berish, murakkab tushunchalarni sodda va tushunarli qilib yetkazish, va talabalarning qobiliyatlarini rivojlantirish mahoratini sotadi. Uning mahsuloti – shogirdning bilim va ko‘nikmalari.

Buxgalter hisobot tuzish va moliyaviy ma'lumotlarni boshqarish mahoratini sotadi.

Dasturchi dasturiy yechimlar yaratish va muammolarni kod orqali hal qilish mahoratini sotadi.

Dizayner vizual kontseptsiya va estetikani shakllantirish mahoratini sotadi.

Sotuvchi deganda biz anʼanaviy bozordagi sotuvchilarni tushunib qolganmiz aslida hamma nimadirni sotib pul ishlaydi.

Pul topmaslik bu hech nimani sotmaslik degani.

Bizda hech qanday moddiy boylik qolmaganda ham sogʻlik va boʻsh vaqt bor ekan hali pul ishlashga umid bor yaʼni ularni ham sotish mumkin:)

Oʻz vaqtingizni oʻzingiz uchun soting boʻlmasa boshqa odamlar sizning vaqtingizni oʻz reklamachilarga sotib yuboradi🤣.

@tenglama_uz

"Bahonalar kuni"

• Tort yeyish uchun albatta yangi yil yoki to’y bo’lishi kerak.
• Sovg’a berish uchun albatta tug’ilgan kun bo’lishi kerak.
• Sport bilan shug‘ullanish uchun albatta dushanba bo‘lishi kerak.
• Yangi narsani boshlash uchun albatta yangi yil qarori kerak.
• O’zini yaxshi his qilish uchun albatta yakshanba bo‘lishi kerak.
• Do‘stlarni ko‘rish uchun albatta maxsus tadbir kerak.
• Sog‘lom ovqatlanish uchun albatta dietani boshlash kerak.
• Nafsni tiyish uchun albatta ramazon oyi bo’lishi kerak.

Ertangi kunlar muhim, bugungi kun emas, vaholanki bugungi kun kechagi kunlar uchun muhim kun edi.


@tenglama_uz

Ishonch

Tanishimning kartasidan 2 mln so‘m o‘g‘irlandi.
Kursdoshimni aldab, 500 ming so‘m olib ketishdi.
Qo‘shnidan 200 ming so‘mni, tog‘amdan esa millionlarni firibgarlik bilan tortib olishdi.
Hozir bunday odamlar ko‘paygan. Ularning maqsadi o‘g‘irlik emas, balki ishonchni egallash. Keyin esa o‘z yo‘llariga solishadi.

Maslahatlar:
• Telegram firibgarliklarining markaziga aylangan, ehtiyot bo‘ling.
• Kartangiz raqamlari, amal qilish muddati va SMS orqali kelgan kodlarni sir saqlang.
• Pasport seriyasi, JSHIR va tug‘ilgan sanangizni begonalarga bermang.
• Pulingizni "oson" yoki "arzon" gaplarga ishonib xavf ostiga qo‘ymang.
• Tanimagan odamlarga ishonmang. Profil rasmi va username’siz Telegram kanallari firibgarlik manzili bo‘lishi mumkin.

70-80% kassalliklar o'giz orqali kiradi.
100% firibgarlik ishlar esa ishonch orqali...

Osonmi demak shubhali, arzonmi demak shubhali!

Hech kimga ishonmang! Hech kimga!

@tenglama_uz