Баҳорсиз баҳор

Бу баҳор баҳорга ўхшамади ҳеч,
Бизнинг айрилиқдек совуқ ва дилгир.
Бўлса, ичингдаги севгингни яшнат,
Йўқса, ичингдаги нафратни ўлдир!

Бу баҳор баҳорга ўхшамади ҳеч,
Юзимни савалар қор парчалари.
Ишқинг умрим аро кеч келганидек,
Ёдинг юрагимни парчалади!

Борлиққа ҳайқирдим қорбўрон ичра:
"Бас, совуқ кунларга чек қўйиб бер, чек!"
... Бу баҳор баҳорга ўхшамади ҳеч,
Севгимиз севгига ўхшамагандек.

14.03.2024 йил

Guljamol_Asqarova

@Iqtisodchi_maxamadiev