SHUKUR XOLMIRZAYEV TAVALLUDINING 85 YILLIGI
Bugun, 2025-yilning 24-mart kuni O‘zbekiston Yozuvchilar uyushmasida O‘zbekiston xalq yozuvchisi Shukur Xolmirzayev tavalludining 85 yilligiga bag‘ishlangan adabiy-maʼrifiy tadbir bo‘lib o‘tdi.
Tadbirni O‘zbekiston Yozuvchilar uyushmasi raisi o‘rinbosari G‘ayrat Majid olib bordi. Tadbirda O‘zbekiston Qahramoni Ibrohim G‘ofurov, O‘zbekiston xalq shoiri Usmon Azim, pedagogika fanlari doktori, professor Qozoqboy Yo‘ldoshev, O‘zbekistonda xizmat ko‘rsatgan jurnalist Olim Toshboyev, “Do‘stlik” ordeni sohibi Shodmonqul Salom, yozuvchining qizi Sayyora Xolmirzayeva so‘zga chiqdi va adib asarlarining o‘ziga xos jihatlariga alohida to‘xtaldi.
Shukur Xolmirzayev 1940-yil 24-martda Surxondaryo viloyati Boysun tumanida tug‘ilgan. Toshkent davlat universiteti (hozirgi O‘zMU)ning jurnalistika fakultetini tugatgan (1963). Dastlabki hikoya va ocherklari 1958 yildan nashr etila boshlagan. “Oq otli” (1962), “To‘lqinlar” (1963), “O‘n sakkizga kirmagan kim bor?” (1965) qissalari, shuningdek, yozuvchining shu davrda yozgan hikoyalari “Olis yulduzlar ostida” (1971), “Hayot abadiy” (1974), “Og‘ir tosh ko‘chsa…” (1980), “Yo‘llar, yo‘ldoshlar” (1984), “Bodom qishda gulladi” (1986), “Tog‘larga qor tushdi” (1987) singari to‘plamlaridan o‘rin olgan. “So‘nggi bekat” (1976), “Qil ko‘prik” (1984), “Yo‘lovchi” (1987), “Olabo‘ji” (1992), “Dinozavr” (1-kitob, 1996) kabi romanlar muallifi. “Qora kamar” (1987), “Ziyofat” (1990 yili sahnalashtirilgan) dramalari ham bor. Yozuvchi 2005-yil 29-centyabrda Toshkent shahrida vafot etgan.
Adib Hamza nomidagi Respublika Davlat mukofoti (1989), O‘zbekiston xalq yozuvchisi (1991) faxriy unvoni hamda “Mehnat shuhrati” (1999) ordeni bilan taqdirlangan.
Keyingi yillarda adibning kitoblari tez-tez chop etilib turibdi. Hususan, yozuvchi "Tanlangan asarlar"ining 1-, 2-, 3-, 4-, 5-jildlari, "Bandi burgut" (2014), "Kimsasiz hovli" (2015), "O‘n sakkizga kirmagan kim bor" (2015, 2018), “Shukur Xolmirzayev: tanlangan asarlar” (2020), “Men adabiyotni qismatim deganman...” (2023) va boshqa kitoblari chop etilgan.
Shukur Xolmirzayev o‘zbek hikoyachiligini ustoz Abdulla Qahhordan keyin yangi, yuqori bosqichga ko‘targan yozuvchilardan biridir, deb taʼrif beradi adabiyotshunoslar. Uning hikoya, qissa va romanlari tesha tegmagan voqealarga bag‘ishlangani, xarakterlarga boyligi bilan ajralib turadi. Adib o‘z hikoyalarida Abdulla Qodiriy, Abdulla Qahhor kabi atoqli yozuvchilarning eng yaxshi anʼanalarini davom ettirish bilan birga o‘zbek hikoyanavisligini rus va Yevropa yozuvchilarining badiiy tajribalari bilan ham boyitdi. Yozuvchilar, shoirlar, adabiyotshunoslar, yosh ijodkorlar, yozuvchining oila aʼzolari ishtirok etgan tadbirda Shukur Xolmirzayev bilan bog‘liq iliq xotiralar yodga olindi, u qoldirga adabiy merosga yana bir bor nazar tashlandi.
Adabiyot muxlislari adibning asarlarini tarjima qilish, uning ijodini keng targ‘ib qilish borasidagi takliflarini bayon qildi.
O‘zbekiston Yozuvchilar uyushmasi Axborot xizmati
